Insoniyat yangi Crew Dragon kosmik kemasi bilan faxrlanishi mumkin. Bu haqda SpaceX rahbari Ilon Mask NASA’ning to‘g‘ridan to‘g‘ri efiri vaqtida ma’lum qildi.
“Ushbu kema insonlar tomonidan insonlar uchun yaratilgan. O‘ylashimcha, insoniyat shu kunlarda sodir bo‘layotgan voqealardan faxrlanishi mumkin”, — deydi Mask. Uning ta’kidlashicha, Crew Dragon’ning uchirilishi “qalban tadqiqotchi bo‘lganlarda xayrixohlik hissini uyg‘otadi” va u o‘zida ham turli hissiyotlar junbushga keltirayotganini tan olgan.
Maskning so‘zlariga ko‘ra, ushbu missiya “insonlarning multisayyorali turiga aylanishi yo‘lidagi birinchi qadam” hisoblanadi. O‘z navbatida, u “g‘alabani e’lon qilishga” hali erta ekanligini ta’dilagan: endilikda SpaceX astronavtlarni sog‘-omon yerga qaytarib olib tushishi hamda parvozlar yana qayta va qayta amalga oshirilishi kerak.
Eslatib o‘tamiz, Bortida ikki astronavt — Duglas Xyorli va Robert Benken bo‘lgan Crew Dragon kemasi 30-may kuni (Toshkent vaqti bilan 31-mayga o‘tar kechasi) Floridadagi Kennedi kosmik markazidagi maydonchadan muvaffaqiyatli start oldi. Parvoz ikkinchi urinishda amalga oshirildi — 27-may kuni startga 16 daqiqa qolganida parvoz noqulay ob-havo sharoiti tufayli qoldirilgan edi.
Izoh (0)