Toshkent davlat transport universiteti va Fransiya ta’lim muassasalari o‘zaro hamkorlik qilish ishlarini muhokama qildi

O‘zbekiston Respublikasi Transport vazirligi ko‘magida Yevropada aviatsiya sohasidagi eng katta o‘quv yurti hisoblangan Fransiyaning Fuqarolik aviatsiyasi milliy maktabi (ENAC – École nationale de l’aviation civile) hamda Tuluza biznes maktablari bilan hamkorlik aloqalarini o‘rnatish, kelajakda mamlakatda aviatsiya sohasi uchun malakali uchuvchilar, yetuk mutaxassislarni tayyorlash maqsadida videomuloqot tashkil etildi, deya xabar beradi vazirlik axborot xizmati.

Qayd etilishicha, videomuloqotda Fransiyaning Fuqarolik aviatsiyasi milliy maktabi, Tuluza biznes maktabi hamda Airbus kompaniyasining vakillari bilan O‘zbekiston Respublikasi Transport vazirligi va Toshkent davlat transport universiteti o‘rtasidagi istiqbolli rejalar muhokama qilingan.

Videomuloqotda Fransiyadan ENAC maktabining direktori o‘rinbosari – xalqaro ishlar bo‘yicha direktor Nikolas Kasalis, ENAC uchuvchilar maktabi direktori Teri de Baskia, Tuluza biznes maktabining aviatsiya sohasida biznes boshqaruvi magistraturasi yo‘nalishini muvofiqlashtiruvchi direktori Kristof Benaroya, O‘zbekiston Respublikasidan transport vazirining o‘rinbosarlari Jasurbek Choriyev hamda Akmal Mirzayev, Toshkent davlat transport universiteti rektori Odil Abdurahmonov va boshqa mas’ullar ishtirok etdi.

Muhokamalar yakunida bir qator yo‘nalishlarda memorandum tuzishga kelishib olindi. Xususan, Toshkent davlat transport universitetida o‘quv bazasini yaratish, fuqaro aviatsiyasi uchuvchilarini tayyorlash yuzasidan bakalavriat va magistratura mutaxassisliklari bo‘yicha qo‘shma dasturlar tuzish ko‘zda tutilmoqda.

Shuningdek, uchuvchilarni tayyorlash maqsadida talabalar akademik mobillik dasturlarini yo‘lga qo‘yish, professor-o‘qituvchilarni Fuqarolik aviatsiyasi milliy maktabida malaka oshirish va stajirovka dasturlari bo‘yicha o‘qishga yuborish nazarda tutildi.