Xalq ta’limi vaziri maktablarga sharoit yaratishda ko‘p masala hokimlarga bog‘liq ekanini aytdi

Xalq ta’limi vaziri Sherzod Shermatov ijtimoiy tarmoqda e’lon qilgan Toshkentdagi yangi ta’mirlangan maktablar haqidagi videorolikdan keyin “Qachon viloyatda bo‘ladi?” deb qoldirilgan izohlarga javob berdi.

Vazir o‘z postida Namanganda hokimning ta’limga e’tibor qaratishi natijasida 2 yilda sezilarli o‘zgarishlar amalga oshirilganini aytib o‘tgan. Jumladan, Shermatov respublika bo‘ylab amalga oshirilgan o‘zgarishlarni sanab o‘tgan:

• 2018/2019-yillarda 9 ta yangi maktab qurildi, 85 ta ta’mirlandi, ularga ajratilgan mablag‘lar 2015/2016-yillardagiga qaraganda 4 barobardan ortgan;
• 183 ta maktab “burjuyka” pechlaridan xalos bo‘lgan;
• 165 ta maktab ichimlik suvi bilan ta’minlangan;
• barcha ta’mirtalab maktab hojatxonalarini yangidan qurish yoki ta’mirlash uchun homiylar biriktirilgan.

Agar ta’lim mas’ullarini eshitib, maktablarda kamchilik bo‘lsa  mablag‘ bilan yordam berish o‘rniga hokimlar o‘zing hal qil deydigan bo‘lsa, unda joylardagi ta’lim mutasaddilari muammoni berkitishga yoki o‘qituvchi va ota-onalardan noqonuniy pul yig‘ish orqali mavjud muammolarni hal etishga harakat qiladilar.

Albatta, Namangan maktablarida hamma masala hal bo‘ldi, degan fikrdan ancha yiroqmiz. Hali qilinishi kerak bo‘lgan ishlar juda ko‘p. O‘zim avval borgan maktablarning hali anchasiga mablag‘ yetmaganligi tufayli ta’mirlanmaganligiga ham guvoh bo‘ldim. Sababi ajratilgan mablag‘lar undan-da yomon maktabning ta’miriga yo‘naltirilgan. Ko‘p masala iqtisodiy ahvolimiz va moliyaviy resurslarga bog‘liqligini hammamiz bilamiz.

Shuning uchun hokimlarimiz va sektor rahbarlari joylardagi maktablarimiz sharoitlarini yaxshilashga haqiqiy yordamlarini ayamaydilar, deb umid qilamiz”, – deb yozadi Sherzod Shermatov.

Avvalroq Sherzod Shermatov maktab bitiruvchilarining OTMga kirish darajasi past bo‘lgan tuman mutasaddilariga chora ko‘rilishini aytgan edi.