Toshkentda 30-iyun, seshanba kuni DXX, IIV, Toshkent shahar DXXB hamda IIBB xodimlari bilan hamkorlikda yashirin faoliyat olib borgan “Tavhid va jihod katibasi” (“TJK” O‘zbekiston Respublikasi Oliy sudining 2016-yil 26-sentabrdagi qarori bilan terrorchilik tashkiloti deb topilib, O‘zbekistonda uning faoliyati taqiqlangan) xalqaro terrorchilik tashkilotining bir guruh tarafdorlari fosh etildi. Bu haqda IIV axborot xizmati xabar qilgan.
IIV huzuridagi Tergov departamenti yurituvida bo‘lgan jinoyat ishi doirasida Toshkent shahrining Olmazor va Shayxontohur tumanlari hududidagi 8 ta manzilda tintuv o‘tkazilib, 11 nafar shaxs ichki ishlar idoralariga keltirilgan.
Mavjud ma’lumotlarga ko‘ra, mazkur shaxslar hozirda Suriyada faoliyat olib borayotgan “TJK” jangarilarining g‘oyaviy ta’siriga tushgan holda Toshkent shahrida yashirin guruh tuzib, noqonuniy yig‘ilishlar davomida internet tarmog‘i orqali ko‘chirib olingan ekstremistik mazmundagi materiallarni muhokama qilgan. Ular “hijrat” va “jihod” amallarini bajarish maqsadida Suriya davlatiga chiqib ketishni rejalashtirgan.
Ushlangan shaxslarning yashash manzillaridan jinoyatga aloqador bo‘lgan ashyoviy dalillar topilib, qonuniy tartibda rasmiylashtirib olingan. Tergov-surishtiruv tadbirlari davom ettirilmoqda.
Avvalroq 2020-yil 24-iyunda Toshkentda xalqaro terrorchilik tashkilotining 25 nafar a’zosi qo‘lga olingani, 9-iyunda Boysunda “Jihodchilar” guruhi IIV va DXX tomonidan ushlangani, 28-mayda Farg‘onada “Hizb ut-Tahrir” terrorchilik tashkiloti a’zolari qo‘lga tushirilgani haqida xabarlar berilgandi.
