Rossiya prezidenti Vladimir Putin COVID-19 koronavirusining sun’iy ravishda tarqatilgani haqidagi gap-so‘zlarda aniq va asosli faktlarni ko‘rmayotganligini aytib o‘tdi. RF davlat rahbari pandemiya sabab yuzaga kelgan inqirozni o‘zi bevosita fuvoh bo‘lgan eng katta miqyosdagi hodisalardan biri sifatida alohida qayd etdi. Putinning aytishicha, hozir bu qayerdan kelib qolganini kavlab, yaraga tuz sepmaslik, aksincha, sodir bo‘layotgan vaziyatni og‘irlashtirmaslik uchun kurashish zarur. U bu haqda “Rossiya 1” telekanalining “Moskva. Kreml. Putin” ko‘rsatuviga bergan intervyusi vaqtida gapirgan.
“Virusni kimdir atayin tarqatdi, bu maxsus tayyorlangan ish deya gapirishga asos yo‘q. Menimcha, agar kimdir ushbu taxmin haqiqat deb shu gapga yopishib olsa, buning oqibati yaxshi bo‘lmaydi”, — degan Putin.
Eslatib o‘tamiz, avval AQSh va Yevropaning boshqa davlatlari virusning tabiiy yo‘l bilan tarqalganini ma’lum qilgan Xitoyni ushbu versiya uchun keskin tanqid qilgandi.
Rossiya prezidentining fikricha, mamlakatlar COVID-19’ga qarshi samarali kurash olib borishi va bunda bir-birlarini aybdor qilmasligi zarur.
Mavzuga doir:
- Putin SSSR respublikalariga “rus xalqi tomonidan berilgan sovg‘alarni” eslab o‘tdi (video)
- Putin prezidentlik saylovlarida yana ishtirok etishi mumkinligiga shama qildi
- Putinning Ikkinchi jahon urushi haqidagi maqolasi e’lon qilindi. U Boltiqbo‘yi davlatlarining SSSRga qo‘shilishi qonuniy bo‘lgani haqida yozgan
Rossiya yetakchisi pandemiya tufayli yuzaga kelgan ijtimoiy-iqtisodiy inqirozning ko‘lamiga ham baho bergan.
“Menimcha, bu eng katta masshtabdagi inqirozlardan, darhaqiqat eng og‘ir damlardan biri”, — deydi Putin.
U mamlakatning o‘z vaqtida va puxta ish tutib, ushbu og‘ir vaziyatdan juda kam yo‘qotishlar bilan chiqib ketishiga real baho berganini alohida ta’kidladi.
Rossiyada 28-iyun holatiga ko‘ra, bir sutka davomida 6791 ta yangi kasallanish holati qayd etilgan. COVID-19 koronavirus infeksiyasini yuqtirib olganlar soni 634 437 nafarga yetgan. Rossiya butun dunyoda kasallanganlar soni bo‘yicha 3-o‘rinda bormoqda. Mamlakatda epidemiya boshlanganidan buyon 9 ming kishi COVID-19 asoratlari oqibatida hayotdan ko‘z yumgan. Deyarli 400 ming nafar odam kasallikdan tuzalgan.
Izoh (0)