Turizmni rivojlantirish davlat qo‘mitasi raisi Aziz Abduhakimov qadimiy Ipak yo‘li bo‘ylab zamonaviy karvonsaroylar qurishni taklif qildi

O‘zbekiston Respublikasi bosh vazir o‘rinbosari — Turizmni rivojlantirish davlat qo‘mitasi raisi Aziz Abduhakimov 23-iyun kuni videokonferensiya shaklida o‘tgan Turkiy tilli davlatlar hamkorlik kengashi (TTDHK) turizm vazirlarining V yig‘ilishida ishtirok etdi va unda bir nechta tashabbusni ilgari surdi. Bu haqda Turizmni rivojlantirish davlat qo‘mitasi axborot xizmati xabar qilgan.

Turizm vazirlarining onlayn uchrashuvida TTDHK bosh kotibi Bagdad Amreyev, Turkiya madaniyat va turizm vaziri Mehmet Ersoy, Ozarbayjon turizm agentligi raisi Fuat Nagiyev hamda TTDHK mamlakatlarining turizm tashkilotlari rahbarlari qatnashgan.

Tadbirda Aziz Abduhakimov Turkistondagi Ahmad Yassaviy maqbarasi, Toshkent viloyatidagi Zangiota va Qo‘ng‘irot tumanidagi Hakim ota Boqirg‘oniy ziyoratgohlarini o‘z ichiga olgan “Oltin uchburchak” turini faollashtirishni taklif etdi. Bundan tashqari, chegaraoldi hududlarida offshorlar turistik klasterlarini tashkil qilish, unda savdo-sotiq va boshqa alohida soliq shart-sharoitlarini yaratish ko‘zda tutilganini ta’kidladi.

“Biz turkiy tilli davlatlar madaniyati va an’analarini namoyish etuvchi turli festivallarni tashkil qilish hamda ularning o‘tkazilishini ishtirokchi mamlakatlarning madaniy tadbirlar yagona taqvimini shakllantirish orqali birgalikda targ‘ib qilishni taklif etamiz”,– degan Abduhakimov.

U yig‘ilish ishtirokchilariga so‘nggi yillarda O‘zbekistonda o‘tkazilayotgan “Maqom”, “Baxshi”, Xalq amaliy san’ati festivali kabi yirik madaniy-ommaviy festivallar haqida ham ma’lumot bergan.

Onlayn konferensiya davomida bosh vazir o‘rinbosari Turkiy tilli davlatlar hamkorlik kengashiga a’zo mamlakatlarning tarixiy va turistik shaharlari o‘rtasida aviareyslar soni va yo‘nalishlarini oshirish, ularning geografiyasini kengaytirishni ham taklif qilgan. Xususan, Turkiya, Ozarbayjon, Vengriya va boshqa ishtirokchi mamlakatlarning tarixiy va turistik shaharlari o‘rtasida transport aloqalarining yangi yo‘nalishlari ushbu davlatlar iqtisodiyotiga ijobiy ta’sir qilishi, bundan tashqari, sayyohlarga qulaylik yaratish maqsadida qadimiy Ipak yo‘li bo‘ylab zamonaviy karvonsaroylar qurish lozimligini qayd etdi.