“Manchester Yunayted” Angliya chempionatining 31-tur bahsida “Sheffild Yunayted”ni 3:0 hisobida mag‘lub etdi.
Foto: Getty Images
“Qizil iblislar” bosh murabbiyi Ole-Gunnar Sulsher uchrashuvning 80-daqiqasiga qadar zaxira futbolchilaridan foydalanmadi, ammo keyin birdaniga besh futbolchini maydonga tushirishga qaror qildi. Skott Maktominay, Odion Igalo, Xuan Mata, Daniel Jeyms va Andreas Pereyra o‘yinga qo‘shilgan bo‘lsa, Pol Pogba, Markus Reshford, Brunu Fernandesh, Antoni Marsyal va Meyson Grinvud maydonni tark etdi.
Shunday qilib, Sulsher Premyer Liga tarixida bir o‘yin davomida birdaniga beshta almashtirishga qo‘l urgan birinchi murabbiyga aylandi.
Qayd etish joiz, Sulsher “Manchester Yunayted”dagi futbolchilik faoliyati davomida zaxiradan maydonga tushib, o‘yinni kuchaytira oladigan o‘yinchi sifatida obro‘ga ega bo‘lgan. Hatto, uni “super zaxira o‘yinchisi” deb ham atashgan.
Eslatib o‘tamiz, koronavirus pandemiyasi tufayli uzoq davom etgan tanaffusdan keyin FIFA jarohatlar va og‘ir yuklamalarning oldini olish maqsadida jamoalarga har bir o‘yinda beshtadan futbolchi almashtirishga ruxsat bergan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
