Isroildagi Veysman instituti va Ben-Gurion universiteti tadqiqotchilari o‘zgalar suhbatini tinglashning noodatiy usulini topdi. Buning uchun deyarli har bir binoda bor oddiy lampochkadan foydalansa bo‘ladi, deb xabar qiladi ZDNet.

Foto: Unsplash

Yangi usul Lamphone nomini oldi — u tovush to‘lqinlarining atrofdagi narsalarga tegishi natijasida hosil bo‘ladigan tebranishlarga asoslangan. Olimlarning ta’kidlashicha, ishlayotgan lampochkalarda tebranish milt-milt yonib o‘chishlarni hosil qiladi. Kuchli sensorlar yordamida mutaxassislar yorug‘likning ushbu tebranishini yozib olishi va lampochka yuzasidagi ovoz to‘lqinlarini o‘qishi mumkin.

Ammo Lamphone’ning o‘ziga yarasha jiddiy cheklovi bor. Masalan, lampochka ovoz to‘lqinlariga to‘g‘ridan to‘g‘ri ochiq bo‘lishi kerak. Ko‘p hollarda yorug‘lik manbayi plafonlarga yashiringan  yoki boshqa cheklovlar bo‘ladi, shu sababli aksariyat joylarda o‘zgalarni tinglashning yangi usuli foyda bermaydi. Agarda lampochka to‘liq ochiq bo‘lsa, teleskop va elektrooptik datchik yordamida istalgan masofadan turib, lampochkadagi yorug‘lik o‘zgarishini yozib olish mumkin.

Tajriba davomida olimlar 25 metr uzoqlikda joylashgan ofisdagi ovozlarni yozib olishga muvaffaq bo‘lgan.