Kanchelskis: O‘zbekistonda niqobsiz ko‘chaga chiqib bo‘lmaydi. Jarima bir oylik maoshga teng

“Navbahor” klubi bosh murabbiyi Andrey Kanchelskis O‘zbekistondagi karantin haqida o‘z fikrlarini bildirib o‘tdi.

“Kasallanganlar soni asta sekin ortib bormoqda. Bu yerda (O‘zbekistonda) hammasi kuchli nazorat ostida.

O‘n kun avval ko‘chaga niqobsiz chiqqanlik uchun jarima joriy qilindi. Qanday jarima? Bitta oylik. Agar qoidabuzarlik qaytarilsa, jarima miqdori ham oshib boradi.

Karantinda o‘tiribmiz, uy sharoitida formani ushlab turishga harakat qilyapmiz. Legionerlar bazada, tennisbol o‘ynab turishga chiqishadi.

Namanganda 20-aprelga qadar karantin joriy etilgan. Agar kasallar soni ortsa, karantin muddati yana ko‘payadi.

Zaruriyat bo‘lib qolsa ko‘chaga chiqish mumkin, biroq tibbiy niqob va qo‘lqop taqqan holda. Bu yerda hech kim qayerga ketayotganing va nima uchun chiqqaningni so‘ramaydi. Asosiysi, niqob bo‘lsa bas, qolgani muhim emas.

Ko‘chada xalq kamaygani yaqqol bilindi. Shahardan viloyatga chiqish yo‘li yopiq, bu kuchli nazorat qilinmoqda. Do‘konlarda oziq-ovqat yetarli, bozorlar ochiq. Bu borada muammo yo‘q. Ajiotaj va sarosima bo‘lmadi, Rossiyadagi kabi hech kim barcha grechkani sotib olmadi. Hamma keyinchalik nima bo‘lishini kutmoqda.

Shu sabab butun dunyo kabi biz ham uyda o‘tiribmiz, Belarus chempionatini kuzatyapmiz. Bu hech narsadan ko‘ra yaxshiroq. Takroriy namoyish etilayotgan o‘yinlarni allaqachon yoddan bilamiz. Bu esa yangi. Shu tufayli qiziqish bilan kuzatyapman, yoqish-yoqmasligi esa ikkinchi o‘rindagi masala. Muhimi takror emas jonli ekani. O‘yinlar yomon bo‘lmayapti.

Uyga qaytishga urinib ko‘rdimmi? Albatta, Rossiyaga ketishni xohladim. Biroq shu yerda qolishga, jamoa va legionerlarni qo‘llab quvvatlab turishga qaror qildim. Qolish qarori to‘g‘ri bo‘ldi deb hisoblayman”, — deydi Kanchelskis.

Ma’lumot uchun, karantinli va inson uchun xavfli bo‘lgan boshqa yuqumli kasalliklar paydo bo‘lishi hamda tarqalishi sharoitida vakolatli organning maxsus talablariga zid ravishda jamoat joylarida niqobsiz bo‘lish bazaviy hisoblash miqdorining besh baravarigacha (31-mart holatiga ko‘ra, 1 115 000 so‘m) miqdorda jarima solishga sabab bo‘ladi.