Namangan shahrida ishbilarmonlar karantin sharoitida qiynalayotgan oilalarga yordam berish maqsadida jamg‘arma tuzdi. Bu haqda “Daryo” muxbiri Azizbek Abduvaliyev xabar bermoqda.
“Diyor” majmuasi rahbari Abduvohid Azimovning aytishicha, “Tadbirkorlar saxovat jamg‘armasi” bir guruh namanganlik ishbilarmonlarning Telegram tarmog‘idagi tashabbusi tufayli yuzaga keldi.
Hozirgi kunda unga a’zo bo‘lganlar soni 2 mingdan oshib ketdi.
— Kimdir ochilgan hisob raqamiga mablag‘ tushiryapti, kimdir bank plastik kartasidan pul o‘tkazdi, yana kimdir oziq-ovqat mahsulotlari olib keldi. Volontyorlar va transport vositalarini ajratganlar ham bo‘ldi. Shu tashabbus boshlangandan beri o‘tgan 3 kun davomida 200 million so‘mdan oshiq pul va 300 million so‘mlikdan ko‘proq oziq-ovqat mahsulotlari yig‘ildi, — deydi Abduvohid Azimov.
Un, yog‘, guruch, shakar, tuxum, kartoshka, sabzi va piyozdan iborat to‘plamlar bir oila hafta davomida tashqariga chiqishiga ehtiyoj qoldirmaslik uchun mo‘ljallangan.
Ular bitta manzilda jamlanib, shahar hokimligi tomonidan taqdim etilgan ro‘yxat asosida ehtiyojmand oilalarga yetkaziladi.
Shahardagi 200 dan ortiq xonadon uchun mo‘ljallangan ilk avtokarvon “Biz beparvo emasmiz. Biz mehr ulashamiz!” shiori ostida mahallalarga yo‘l oldi.
Izoh (0)