Toshkentda yomg‘ir: odamlardan “dam olayotgan” tabiat, serqatnov velosipedchilar, harakatlanayotgan maxsus texnika — suratlarda

“O‘zgidromet” O‘zbekistonda aprel oyining birinchi kuni yomg‘irli ob-havo bilan boshlanishini ma’lum qilgan edi.

Unda, havo o‘zgarib turishi, vaqti-vaqti bilan yomg‘ir yog‘ishi, sharqiy shamol yo‘nalishini o‘zgartirib, g‘arbdan 5-10 metr/sekund tezlikda esishi, harorat kechasi 10-12 daraja iliq, kunduzi 15-17 daraja iliq bo‘lishi aytilgan. Ob-havoning o‘zgarishi Kaspiy dengizi janubi-g‘arbiy qismi ustidagi janubiy siklon O‘zbekiston hududiga siljishi natijasida ro‘y bergan.

2-aprel, payshanba kuni, tunda va ertalab Toshkent viloyati va Farg‘ona vodiysi viloyatlarida ob-havo nobarqaror bo‘lib turadi, kunduzi yog‘ingarchilik bo‘lmaydi. Kechasi harorat 5-10 daraja bo‘ladi, kunduzi biroz ko‘tarilib, 15-20 darajani tashkil qiladi.

“Daryo” muxbiri 27-martdan buyon ko‘chaga kam chiqishi tavsiya etilgan shahar ahli noqulay ob-havo sharoitida nimalar bilan band ekanligini kadrlarga muhrladi.

Eslatib o‘tamiz, O‘zbekistonga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasi qaroriga muvofiq, 22-martdan Toshkentda jamoat transporti harakati to‘xtatilgan. 30-martdan esa shaxsiy transportdan foydalanishga cheklov qo‘yilishi ma’lum qilingan.

1-aprel holatiga ko‘ra, O‘zbekistonda koronavirusga chalinganlar soni 173 nafarga yetgan.

Odamlardan “dam olayotgan” tabiat. 

Noqulay ob-havo sharoitida ham jamoat transporti va shaxsiy avtomobillarsiz qolgan aholi harakatlanishning turli yo‘llariga murojaat qilmoqda. Kimdir piyoda, boshqa birov velosiped yoki mototsiklda.