Kam uchraydigan kasallikdan aziyat chekuvchi Lyusi laqabli mushuk Instagram’da mashhur bo‘lib ketdi, deb yozadi Metro.
Foto: Metro
Mushuk egasi unga alohida akkaunt ochdi. Instagram foydalanuvchilari dastlab uning ko‘rshapalakni eslatuvchi tashqi qiyofasidan qo‘rqib ketdi. Keyinroq Lyusining boshidan o‘tkazganlarini bilgach, unga bo‘lgan mehrlari oshdi.
Sfinks nasliga mansub to‘q kulrang Lyusi gidrosefaliyaga chalingan, bu kasallik orqa miya suyuqligining haddan ziyod ko‘payishi bilan kechadi.
Kasallik tufayli mushukning miyasi shakli o‘zgargan, ko‘zlari esa kosasidan tashqariga chiqib qolgan. Shuning uchun ham u tashqi ko‘rinishi bilan ko‘rshapalakni eslatadi.
Mushukning egasi 44 yoshli isroillik ayol Zilla Bergaminining aytishicha, mushuk kichkina paytida uning qon bosimi yuqori bo‘lgan. Muolajalardan so‘ng uning qon bosimi tushgan.
Hozirda mushukning Instagram’da 25 ming folloveri bor.
Foto: Metro
“Ayrimlar Lyusining tashqi ko‘rinishiga qarab nega uni boqishimga hayron bo‘ladi. Bunday xunuk jonivorlar uyda boqilishga arzimaydi, deb o‘ylaydi”, — deydi Bergamini.
Bergaminining aytishicha, nogironligi bo‘lgan jonivorlar ham boshqa sog‘lom jonivorlar kabi mehr berishga munosib.
