Hindistonda odamlarni koronavirus infeksiyasidan “to‘liq izolyatsiya” qilish uchun 21 kunlik karantin e’lon qilindi. Bu haqda bosh vazir Narendra Modi xalqga qilgan murojaatida ma’lum qildi, deb yozmoqda Reuters.
Modining qo‘shimcha qilishicha, cheklovlar 25-martga o‘tar kechasi amal qilishni boshlaydi. Hukumat odamlarga uydan chiqishni to‘liq taqiqlaydi.
“Hindiston shunday bosqichda turibdiki, bunda bizning harakatlarimiz ushbu ulkan falokat ta’sirini kamaytirishda ko‘p narsani hal etadi”, — deya ta’kidlagan Narendra Modi.
India Today’ning yozishicha, hukumat rahbari sog‘liqni saqlash sohasini qo‘llab-quvvatlashga 150 milliard rupiy (1,9 milliard dollar) ajratishni ham va’da bergan. Pullar koronavirus testlariga hamda himoya vositalarini xarid qilishga sarflanadi.
JSST ma’lumotiga ko‘ra, 24-mart holati bo‘yicha Hindistonda koronavirus yuqtirib olish bo‘yicha 450 ta holat kuzatilgan va 7 nafar odam infeksiya keltirib chiqargan kasallikdan vafot etgan. Davlat pandemiya sabab 15-aprelgacha viza berishni vaqticha to‘xtatgan, lekin “kechiktirib bo‘lmaydigan” sabablar kuzatilsa, so‘rovni qayta ko‘rib chiqishi mumkin.
Izoh (0)