Dunyo bo‘yicha COVID-19 koronavirus pnevmoniyasiga chalinganlar soni 400 ming kishidan oshib ketdi. Jons Xopkins universiteti ma’lumotlariga ko‘ra, bemorlar soni ko‘pligi bo‘yicha yuqori beshlikdan Xitoy, Italiya, AQSh, Ispaniya va Germaniya joy olgan.

Yangi koronavirus infeksiyasi qurbonlari soni 18 mingdan oshib ketgan. Universitet ma’lumotlariga ko‘ra, Italiyada 6,8 mingdan ortiq, Xitoyda salkam 3,3 ming, Ispaniyada 2,8 ming, Eronda salkam 2 ming, Fransiyada esa 860 kishi kasallikdan vafot etgan.

Kuni kecha Jahon sog‘liqni saqlash tashkiloti (JSST) rahbari Tedros Gebreyesus koronavirusning tarqalish sur’ati o‘sib borayotganidan ogohlantirgan edi. U kasallikka qarshi kurash ishlarini muvofiqlashtirish va tibbiy anjomlar ishlab chiqarishni oshirish taklifi bilan G20 ga kiruvchi barcha mamlakatlar rahbarlariga murojaat qilishini ma’lum qilgan edi.

Koronavirus pandemiyasi sabab 2020-yil iyulida Tokioda boshlanishi lozim bo‘lgan Olimpiada o‘yinlari qoldirildi. Sport o‘yinlari 2021-yilda o‘tkazilsa-da, “Tokio—2020” nomini saqlab qoladi.

So‘nggi rasmiy ma’lumotlarga ko‘ra, O‘zbekistonda 50 kishi koronavirus infeksiyasini yuqtirib olgan. Bemorlardan biri na xorijda bo‘lgan, na kasallangani avval aniqlangan kishilar bilan muloqotda bo‘lgan. Ayni vaqtda besh bemor sog‘aygani ma’lum qilindi.