Turkmaniston koronavirus sabab O‘zbekistonda ta’lim olayotgan talabalarini orqaga qaytarmoqda

O‘zbekistonda koronavirus tarqalgani aniqlanganidan so‘ng, Turkmaniston o‘z talabalarini mamlakatdan orqaga qaytara boshladi, deb xabar beradi “Xronika Turkmenistana”.

16—17-mart kunlari Buxoro viloyatidagi “Olot—Forob” chegara punkti orqali turkmanistonlik 21 talaba vataniga qaytdi. Ular asosan Buxoro viloyati dargohlarida ta’lim olishgan. Yotoqxonada yashagan talabalarning ba’zilari darhol karantinga olingan.

Xorazm viloyatidagi “Shovot” chegara punkti 17-mart kunigacha ochiq bo‘lgan va undan Toshhovuz viloyatida yashovchi o‘nlab talabalar Turkmanistonga qaytishga ulgurgan. Umumiy hisobda Xorazm viloyatidagi oliy ta’lim dargohlarida 1100 ga yaqin turkmanistonlik talaba ta’lim olmoqda.

So‘nggi ma’lumotlarga ko‘ra, O‘zbekistonda koronavirus yuqtirib olganlar soni 18 nafarga yetdi.

Eslatib o‘tamiz,  koronavirus sabab O‘zbekistondagi barcha maktablar, bog‘chalar va OTMlar 2020-yil 16-martdan karantinga yopildi. Yo‘lovchilarni manzilga yetkazish uchun avtovokzaldan qo‘shimcha reyslar yo‘lga qo‘yila boshlandi. Toshkentdagi barcha talabalar turar joylari 19-martdan to‘liq yopilib, dezinfeksiya qilinadi.