Germaniyadagi Lambert nashriyotida Samarqand davlat universitetining professori Muslihiddin Muhiddinovning “‘Xamsa’larning ilk dostonlarida komil inson konsepsiyasi” nomli monografiyasi ingliz tilida nashr etildi. Bu haqda adabiyotshunos olim Olimjon Davlatov “Daryo”ga ma’lum qildi.
Olimjon Davlatovning ma’lum qilishicha, adabiyotshunos olim Muslihiddin Muhiddinov fan tarixida birinchi marta “Hayrat ul-abror” dostonini monografik yo‘sinda tadqiq etib, Navoiyning diniy-tasavvufiy va falsafiy-axloqiy qarashlarini ilmiy jihatdan xolis va har tomonlama asoslab bergan.
Mazkur monografiyada Nizomiy Ganjaviy, Amir Xusrav Dehlaviy, Abdurahmon Jomiy hamda Alisher Navoiy “‘Xamsa’laridagi ilk dostonlarida komil inson tushunchasining badiiy-falsafiy talqini haqida so‘z yuritiladi.
Muallif xamsachilikdagi falsafiy-didaktik dostonlarda Sharq mumtoz adabiyotidagi komil inson ideali haqidagi qarashlarni qiyosiy o‘rganib chiqib, Alisher Navoiyning falsafiy-axloqiy qarashlarining o‘ziga xosliklarini ochib berishga erishgan.
Germaniyalik mutaxassislarning ta’kidlashicha, Alisher Navoiyning falsafiy-axloqiy qarashlarini yoritib beruvchi ushbu monografiya yevropalik mutaxassislarni qiziqtirishi shubhasiz. Negaki, Alisher Navoiy nomi Yevropada ancha mashhur bo‘lsa-da, uning hayoti va ijodi haqida ma’lumotlar juda kam. “‘Xamsa’larning ilk dostonlarida komil inson konsepsiyasi” ana shu kemtiklikni to‘ldirishga xizmat qiladi.
Ma’lumot uchun, Muslihiddin Muhiddinov 2016-yili “O‘zbekiston Respublikasida xizmat ko‘rsatgan yoshlar murabbiysi” unvoni bilan taqdirlangan.
Izoh (0)