General Motors tarkibiga kiruvchi Cruise kompaniyasi 21-yanvar, seshanba kuni o‘zining birinchi haydovchisiz avtomobili Cruise Origin’ni taqdim etdi. Bu haqda “Kommersant” xabar berdi.
Cruise Origin elektr miniven bo‘lib, uning salonida yo‘lovchilar uchun mo‘ljallangan va bir-biriga qarama-qarshi joylashgan ikkita uch kishilik o‘rindiqdan boshqa hech narsa yo‘q. Origin avtomobili GM tomonidan ishlab chiqariladi. Mashinalar esa kompaniyaning Cruise taksi xizmati doirasida foydalaniladi. Kompaniya avtomobillari foydalanuvchilarning mobil dasturdagi so‘rovidan kelib chiqib yo‘nalish shakllantirgan holda yo‘lovchilarni tashiydi.
Taqdimot vaqtida Cruise bosh direktori Den Ammanning ma’lum qilishicha, bunday haydovchisiz elektromobilda harakatlanish inson tomonidan boshqariladigan taksida yoki shaxsiy transportda harakatlanishdan arzonroq bo‘ladi.
Yaqin vaqt ichida kompaniya mashinani seriyali ishlab chiqarish bo‘yicha rejasini ma’lum qiladi. Cruise avtomobillarining yo‘lovchilarga qachondan xizmat ko‘rsatishi noma’lum. AQSh qonunlari hozircha rulsiz va pedalsiz mashinalardan jamoat yo‘llarida foydalanishni taqiqlaydi.
