Toshkentdagi AQSh elchixonasi Twitter’dagi rasmiy sahifasi orqali bloger Nafosat Olloshukurovaning O‘zbekiston hududini o‘z ixtiyori bilan mustaqil ravishda tark etganini bildirdi. Avval blogerning o‘zi elchixona tomonidan unga ko‘rsatilgan yordam uchun minnatdorlik izhor etgandi.

Foto: “Gazeta.uz”

“AQSh elchixonasi vakillari Olloshukurova mamlakatni tark etishidan avval u bilan uchrashgan va blogerning keyingi taqdirini kuzatib boradi”, — deyiladi elchixona xabarida.

“AQSh so‘z erkinligi masalasini qat’iyat bilan qo‘llab-quvvatlashda davom etadi — bu har qanday jamiyat taraqqiyotiga xizmat qiladigan muhim omil. Prezident Shavkat Mirziyoyev hukumat ustidan jamoatchilik nazoratini ta’minlash hamda o‘z islohotlar dasturi ijrosida erkin va mustaqil OAV zaruriy ehtiyoj ekanini qayd etgan. Jurnalistlar o‘z ishini mustaqil bajara olish imkoniyatiga ega, tahdidlar va ta’qiblardan holi bo‘lishi kerak”, — deya ta’kidlangan xabarda.

Nafosat Olloshukurova 2019-yil 26-sentabrda ma’muriy qamoq jazosini o‘tayotgan paytida ruhiyatida o‘zgarishlar sezilganligi uchun psixiatrning tavsiyasi bilan viloyat ruhiy asab kasalliklari dispanserida ko‘rikdan o‘tkazish uchun olib ketilgan. Keyinchalik fuqarolik ishlari bo‘yicha Urganch tumanlararo sudining 30-sentabrda hal qiluv qaroriga asosan, fuqaro Nafosat Olloshukurova g‘ayriixtiyoriy tartibda Xorazm viloyat ruhiy asab kasalliklari dispanseriga yuborilgan.

Blogerning dispanserda ekani OAVda keng muhokama qilingan, jumladan, Axborot va ommaviy kommunikatsiyalar agentligi rahbari Komil Allamjonov Nafosat Olloshukurova va Davlatnazar Ro‘zmetov bilan bog‘liq voqealarga munosabat bildirib, barcha jurnalist va blogerlarni biror-bir masalani ommaga ko‘tarib chiqayotganda shoshqoloqlik qilmasdan, hissiyotlarga berilmasdan, jiddiy surishtiruv va faktlarga asoslanib, xolis material berishga chaqirgandi. 2019-yil 28-noyabr kuni fuqarolik ishlari bo‘yicha Xorazm viloyati sudining kassatsiya instansiyasi bloger Nafosat (Shabnam) Olloshukurova ruhiy kasalliklar shifoxonasida davolanishni davom ettirish yuzasidan qaror chiqargan. Bir oy o‘tib, 28-dekabrda Olloshukurova Toshkentning Yunusobod tumanidagi uyiga qaytgandi. 31-dekabrda AQSh davlat kotibi Mayk Pompeoning Janubiy va Markaziy Osiyo masalalari bo‘yicha yordamchisi vazifasini bajaruvchi Elis Uells O‘zbekistonda bloger Nafosat Olloshukurovaning uch oydan ortiq ruhiy kasalliklar kasalxonasida ushlab turilganidan so‘ng ozod qilinganini yaxshi yangilik sifatida e’tirof etgan. 20-yanvar, dushanba kuni blogerning O‘zbekistonni tark etgani ma’lum bo‘ldi.