Germaniya tashqi ishlar vaziri Kristofer Burger AQSh hamda Turkiyaning Suriya hududidagi harbiy operatsiyalarni to‘xtatganini yoqlab chiqdi va ushbu qaror hududdagi urush harakatlarining intihosi tomon qo‘yilgan qadam ekanligini qayd etdi. Bu haqda “RIA Novosti” xabar berdi.

Foto: Daily Sabah

Turkiya davlat rahbari Rajab Toyyib Erdo‘g‘on hamda AQSh vitse-prezidenti Mayk Pens muzokaralardan so‘ng turklarning kurdlar chegaradan uzoqlashishi uchun Suriya hududidagi operatsiyalarni 120 soatga to‘xtatishni kelishib olgan. Pensning qayd etishicha, kelishuv bo‘yicha kurdlar Turkiya va Suriya chegarasidan 30 kilometr ichkariga yo‘l oladi va AQSh bu harakatda ularga ko‘mak beradi. Vitse-prezident AQSh qo‘shinining mazkur hududga qaytmasligini ham ma’lum qilgan.

“Suriya shimolidagi urushning tugashini, beqaror vaziyatni o‘nglash va tinch aholining himoyasini ta’minlashni qo‘llab-quvvatlaymiz”, — deya qayd etgan Burger.

Shuningdek, vazir qurol-yarog‘ masalasida Germaniya qabul qilgan qarorning o‘z kuchida qolishini bildirgan.

“Hujumlarning to‘xtatilgani ikki tomonning murosa qilishiga olib keladi. Tinchlik uchun ular strategik masalalarni muhokama qilib olishi lozim” — deydi Germaniya TIV vakili.

Turkiya prezidenti Rajab Toyyib Erdo‘g‘on 9-oktabrda Suriya shimoli-sharqida “Tinchlik bulog‘i” operatsiyasining boshlanganini e’lon qilgan. Anqaraning ushbu harbiy harakatlari Kurdiston ishchi partiyasi jangarilari hamda IShID terrorchilariga qarshi qaratilgandi. Suriya hukumati bir necha bor turklarning bunday harbiy hujum siyosatini qoralagan. Rossiya esa Turkiyani 2011-yildan buyon davom etayotgan Suriya bilan nizolarni tinchlik yo‘li bilan hal etib olishga chaqirgan.