IIV Malaka oshirish instituti professor-o‘qituvchilari keksalar holidan xabar oldi
Ichki ishlar vazirligi Malaka oshirish instituti professor-o‘qituvchilari “Keksalar haftaligi” doirasida Yoshi ulug‘ insonlar holidan xabar oldi. Bu haqda “Daryo”ga IIV Malaka oshirish instituti axborot xizmati xabar berdi.
O‘zbekiston Respublikasi Vazirlar Mahkamasining joriy yil 27-sentabrdagi “Keksa avlod vakillarining jamiyatdagi o‘rni va ijtimoiy faolligini yanada oshirish chora-tadbirlari to‘g‘risida”gi qaroriga muvofiq, BMT Bosh Assambleyasining 1990-yil 14-dekabrdagi rezolyutsiyasi bilan e’lon qilingan “1-oktabr – Xalqaro keksalar kuni”ni har yili O‘zbekistonda munosib nishonlash maqsadida oktabr oyining birinchi haftasi “Keksalar haftaligi” etib belgilandi.
Shu munosabat bilan IIV Malaka oshirish instituti professor-o‘qituvchilari qariyalar xolidan xabar olib, ularning shart–sharoitlari bilan tanishgan.
Xususan, Qoraqalpog‘iston Respublikasi Taxtako‘pir tumani “Oydin ko‘l” mahallasida yashovchi 75 yoshli Shaydoxon O‘razimbetova, Surxondaryo viloyati Termiz tumani “Kokildor ota” mahallasida yashovchi 78 yoshli Qo‘zimurod hoji ota Shobirov, Angor tumani Ulug‘bek nomli mahallada yashovchi 83 yoshli Rohiya momo Xayitova, 1952-yilda tug‘ilgan Bozorboy O‘razimbetov Jarqo‘rg‘on tumani “Ulug‘bek” mahallasida yashovchi 72 yoshli Ulaxon Safarova va boshqalar bilan suhbatlashilgan.
“Ijtimoiy muammolarni tinglagan professor-o‘qituvchilar mahalliy davlat hokimiyati organlari bilan hamkorlikda ularning yechimini topishga e’tibor qaratmoqda”, — deyiladi xabarda.
Qo‘shimcha qilinishicha, institut jamoasi ushbu hudud “Saxovat” uylaridagi keksa avlod holidan ham xabar olgan.
Avvalroq, IIV Malaka oshirish instituti professor-o‘qituvchilari ta’lim muassasalarida tadbirlar uyushtirgani, mehr-muruvvatga muhtoj fuqarolarga g‘amxo‘rlik ko‘rsatgani haqda xabar bergandik.
