Gonkong politsiyasi namoyishchilarni tarqatish uchun ilk marta o‘qotar qurollardan foydalandi

Gonkongda o‘tgan navbatdagi norozilik aksiyasida politsiya namoyishchilarni tarqatish uchun birinchi marta o‘qotar qurollardan foydalandi, deb xabar beradi “Kommersant”.

Gonkongdagi norozilik namoyishlari 1-oktabr Xitoy Xalq Respublikasi tashkil etilganining 70 yilligini nishonlash munosabati bilan o‘tkazilmoqda. Faollar “hokimiyatni xalqqa qaytarish”ga chorlamoqda.

Namoyishchilardan biri yaralangan, u kasalxonaga yotqizildi. Politsiyachilar, shuningdek, ko‘zdan yosh oqizuvchi gaz qo‘llashga ham majbur bo‘lgan. 30 nafar namoyishchi hibsga olingan.

O‘qotar quroldan yaralangan yosh yigit kardiojarrohlik markaziga olib ketilgan. U ko‘kragidan jarohat olgan, uning ahvoli haqida hozircha hech qanday ma’lumot yo‘q.

Qayd etilishicha, hammasi bo‘lib 15 kishi yaralangan, ulardan birining ahvoli o‘ta og‘ir deya baholanmoqda.

Aksiyalar mart oyining oxirida, mitingchilar fikricha, Xitoydan Gonkongga qochib ketgan dissidentlar va muxolifatchilarga qarshi qaratilgan ekstraditsiya qonuni tufayli boshlandi.

4-sentabr Gonkong rahbari Kerri Lam qonunni bekor qilishni e’lon qilgandi, ammo aksiyalar hali ham davom etmoqda.