Soatbay ish haqining oshirilishi munosabati bilan o‘qituvchilarga haq to‘lashda kelib chiqqan tafovutlar, o‘qituvchilar haqidan “ushlab qolingan” pul haqida iyul oyi oxirida “Daryo” kolumnisti va “Domlajon” Telegram-kanali asoschisi Isroil Tillaboyevning maqolasi e’lon qilingan edi. Mavzu hali ham davom etmoqda.

Xabaringiz bor, yaqinda Moliya vazirligiga o‘qituvchilar nomidan murojaat bilan chiqqan edim. Uning qisqacha mazmuni quyidagicha:

Xalq ta’limi vazirligi hamda Bandlik va mehnat munosabatlari vazirligining 2018-yil 27-iyuldagi “Umumiy o‘rta ta’lim muassasalarining pedagogik mutaxassisliklari bo‘yicha namunaviy yillik ish rejasini shakllantirish tartibi to‘g‘risidagi yo‘riqnomani tasdiqlash haqida”gi qo‘shma qarorida alohida qilib soatbay ishlagan o‘qituvchilar dars soatiga asosiy o‘qituvchi bilan teng tartibda maosh to‘lanishi va bu jarayon 2018-yil 1-noyabridan amalga oshirilishi begilab qo‘yilgan. Lekin barcha joylarda o‘rindoshlik asosida ishlovchi o‘qituvchilarning soatbay ish haqi asosiy o‘qituvchinikiga nisbatan kam hisoblangan.

Shundan so‘ng Moliya vazirligi o‘zining javob maqolasida hech qanday anglashilmovchilik bo‘lmagani haqida xabar berdi. Ushbu javobdan qoniqmaganim bois har ikki vazirlikka aniq faktlar keltirgan holda qo‘shimcha dars soatlari va asosiy dars soatlari orasida katta farq borligini ko‘rsatib berdim. Shundan keyin Moliya va Xalq ta’limi vazirliklari 2018-yil noyabridan 2019-yil mart oyigacha o‘rindosh dars soatlari uchun kam haq to‘lab kelinganini tan olib, farqdagi summa qayta hisob-kitobga ko‘ra to‘lab berilishini o‘z saytida ma’lum qildi.

Topshiriq 2019-yil 31-iyul kuni barcha tuman moliya va xalq ta’limi bo‘limlariga qo‘shma buyruq asosida berildi. Ming afsuski, oradan shuncha vaqt o‘tgan bo‘lishiga qaramay, buyruq hali yetib bormagan va yoki yetib borsa ham, uning ijrosi bilan qiziqmayotgan tuman xalq ta’limi va moliya bo‘limlari ko‘p. Yaqinda shaxsiy Telegram-kanalimga shu masala yuzasidan so‘rovnoma joyladim.

Skrin: “Daryo”

Moliya vazirligidan bu buyruq ijrosi respublikaning nechta tumanida to‘liq oxiriga yetkazilgani, dars soatlaridagi farqlar to‘lab berilmayotganining sababi va vazirlik buyrug‘i ijrosini ta’minlamagan tuman moliya bo‘limlari rahbarlariga qanday chora ko‘rilgani haqida javob kutib qolamiz, zero “Ijro intizomini mustahkamlash chora-tadbirlari to‘g‘risida”gi Vazirlar Mahkamasining qarori ijrosi barchaga barobar.

Muallif fikri tahririyat nuqtai nazaridan farq qilishi mumkin.