O‘zbekistonlik shaxmatchi o‘smirlar o‘rtasidagi Jahon chempionatida kumush medalni qo‘lga kiritdi

O‘zbekistonlik shaxmatchi Madaminov Muhiddin 11—13-sentabr kunlari Ispaniyaning Salobreniya shahrida 14, 16, 18 yoshli o‘smirlar o‘rtasida rapid va blits bo‘yicha bo‘lib o‘tgan Jahon chempionatida ishtirok etdi.

Muhiddin 14 yoshlilar o‘rtasida blits bo‘yicha bo‘lib o‘tgan musobaqada raqiblari bilan 1-2 o‘rinlarni bo‘lishib oldi va qo‘shimcha ko‘rsatkichlar bo‘yicha vitse-chempionlikka sazovor bo‘ldi.

Madaminov ayni damda Toshkentdagi Sky Chess maktabi o‘quvchisi hisoblanadi. Qayd etish joiz, 15-sentabr, yakshanba kuni mazkur maktab o‘zining 5 yillik yubileyini nishonladi. Maktab tavallud kuni Sky Chess Open 2019 musobaqasini tashkil etdi. “Daryo” muxbiri esa maktab asoschisini suhbatga tortdi.

Sky Chess shaxmat maktabini ochish g‘oyasi qayerdan kelgan?

— Agar e’tibor berilsa, hamma o‘g‘il bolalarga e’tibor qaratadi. Qizlar esa ko‘p holatda e’tibordan chetda qolardi. Mentalitetimizda ham o‘g‘il bolalar roli kattaroq ahamiyat kasb etadi. Singlim Hulkar bilan avvaliga biz bu maktabni faqat qizlar uchun bo‘lishini rejalashtirgandik. Shunga qaramay ota-onala baribir ham qizlarga qo‘shib, o‘g‘il farzandlarini ham maktabga olib kelgan.

Maktabning ochilishiga va 5 yillik davrni boshdan o‘tkazishiga kim ko‘maklashdi?

— Birinchi o‘rinda eng katta ko‘makchim — dadam bo‘lgan. Maktabni ochib, unga inventarlarni keltirish va jamiyki tashkiliy ishlarni dadam olib borgan. Maktab ochilgan vaqtda dastlab faqat minusda yurardik. Shundan so‘ng musobaqalar o‘tkazishga ota-onalar ham yordam bera boshladi. Ketma-ket g‘olibliklardan so‘ng esa homiylar paydo bo‘ldi.

Maktabda yosh chegarasi bormi?

— Yo‘q. Maktabimizda 3 yoshdan 65 yoshgacha bo‘lgan o‘quvchilarmiz bor. Masalan, o‘quvchimiz 65 yoshli Vladimir Vladimir ayni damda Olmaotadagi musobaqada ishtirok etmoqda. U joriy yil O‘zbekiston chempioni bo‘ldi.

Maktab 5 yilda nimaga erishdi?

— Boshida faqat aqlli qizlarni tarbiyalamoqchi edik. Ammo rejalar yil sayin o‘zgarib ketdi. Endigi maqsadimiz O‘zbekiston uchun aqlli bolalarni tarbiyalashga aylandi. Aqlli bolalar — bizning kelajagimiz. Shaxmat esa shunday bolalarni tarbiyalashda bizga yordam beradi. Shaxmat bilan shug‘ullanadigan bolalarning hammasi ham professional bo‘lmasligi mumkin. Ammo ular ziyrak va aqlli bo‘lib o‘sishi mumkin.

Nafisa Mo‘minova, Sky Chess maktabi asoschisi, xalqaro grossmeyster

Mazkur musobaqani O‘zbekiston terma jamoasi bosh murabbiyi ham kuzatib bordi:

O‘zbekiston terma jamoasini oldin kutib turgan musobaqalar haqida

— Terma jamoa a’zolarini oktabr oyida Turkiyada 16 yoshgacha bo‘lganlar o‘rtasida navbatdagi Butunjahon shaxmat Olimpiadasi kutib turibdi. O‘tgan yili O‘zbekiston terma jamoasi mazkur Olimpiadada birinchi o‘rinni qo‘lga kiritgandi. Bu yil jamoamizni ikki nafar grossmeyster tark etdi. Chunki ularning yoshi endi 16 dan katta. Ammo ikki grossmeyster hamon safimizda — Nodirbek Abdusattorov hamda Javohir Sindorov. Bundan tashqari 2020-yilda kattalar o‘rtasida Butunjahon shaxmat Olimpiadasi bo‘lib o‘tadi. Unga hozirdan tayyorgarliklar boshlangan.

Yosh grossmeysterlarda yulduzlik kasali haqida

— Baxtimizga hozircha bunday holat kuzatilgani yo‘q. Biz ularni har jihatdan nazorat qilib borishga harakat qilamiz. Jumladan, ularning ruhiy holatida o‘zgarish yuz beryaptimi yoki yo‘q shularni kuzatib boramiz. Men hozirgi terma jamoaning yosh a’zolariga doimo Rustam Qosimjonovni namuna qilib ko‘rsataman. U hech qachon hatto Jahon chempioniga aylangan holatda ham yulduzlik kasaliga chalinmagan. U yoshlar uchun  haqiyiy namuna.

Saidali Yo‘ldoshev, O‘zbekiston terma jamoasi bosh murabbiyi, grossmeyster