Namangandagi “gaz-zapravka”da Hyundai porter mashinasi yonib ketdi

Namangan viloyati To‘raqo‘rg‘on tumani yong‘in-qutqaruv xizmatiga 12-sentabr, payshanba kuni soat 07:43 da “Chustko‘prik” MFYda joylashgan “Isoqxon Ibrat metangaz” MChJga qarashli avtomobillarga gaz to‘ldirish kompressor shoxobchasi hududida Hyundai porter yuk mashinasida yong‘in bo‘layotganligi haqida xabar kelib tushgan.

Davlat yong‘in xavfsizligi xizmatining xabar berishicha, yong‘inni bartaraf etishga 2 ta yong‘in o‘chirish bo‘linmasi jalb etilgan. Bo‘linmalar voqea joyiga soat 07:51 da yetib borgan va yong‘in soat 08:00 da to‘liq bartaraf etilgan.

Tan jarohati olganlar va halok bo‘lganlar yo‘q. Hodisa oqibatida Hyundai porter yuk mashinasining saloni va shinalari yonib zararlangan.

Yong‘inga avtomobilga siqilgan gazni to‘ldirgandan so‘ng gaz shlangi uzilmasdan avtomobilning harakatlanib ketishi sabab bo‘lgan deb taxmin qilinmoqda.

Bundan avval Toshkentda “GAZ Sobol” rusumli yuk mashinasi yonib ketgani haqida xabar berilgan edi.