Ayni damda Qatarda faoliyat yuritayotgan o‘zbekistonlik futbol mutasaddisi Alisher Nikimbayev O‘zbekiston terma jamoasining Falastinga qarshi o‘yindagi mag‘lubiyatiga munosabat bildirdi.
“Natija men uchun yoqimsiz kutilmagan voqea bo‘ldi. Ektor Kuperning murabbiylik salohiyati va ayniqsa taktik uslubiga shubha bilan qarab kelgan bo‘lsam-da, bu o‘yinda futbolchilarning saviyasi g‘alaba uchun yetarli bo‘ladi deb o‘ylagan edim. Aslida esa bu kamlik qildi.
Endi nima qilish kerak? Mazkur qiyin savolga O‘FAning hozirgi rahbariyati javob berishi kerak. Avvalgi rahbariyatdan ularga terma jamoaning maqsad, vazifa va uslubiga mos tushmaydigan murabbiy meros bo‘lib qoldi. Shu bilan birga uni iste’foga chiqarish juda qimmatga tushadi.
Demak, agarda Kuperni iste’foga chiqarish qarori qabul qilinsa, bunga pul kerak bo‘ladi. Buning ustiga yangi murabbiy jalb qilish uchun ham mablag‘ talab qilinadi. Bilishimcha, buning uchun O‘FAda pul yo‘q. Avvalgi rahbariyat juda dabdabali hayot kechirgan va nafaqat Mirabror Usmonov davridan qolgan (ayrim ma’lumotlarga ko‘ra 2 million dollar atrofida) pullar, balki so‘nggi ikki yil ichida O‘FA hisobiga tushgan boshqa mablag‘larni ham ishlatib yuborgan.
Moliyaviy holat esa Kuperga o‘rinbosar topish masalasini qiyinlashtiradi. Pulni tejash maqsadida mahalliy mutaxassis tayinlanishi ham mumkin. Aynan kim, barcha mashhur kishilar terma jamoani boshqarishga ulgurdi, qolganlari ushbu lavozimni egallashga qodirmikin? Yoki muxlislar, jurnalistlar va mutaxassislar bir necha yildan beri talab qilayotgan chet ellik murabbiyga ishonish kerakmi?
Kuprening tayinlanishi shu ko‘rsatdiki, chet ellik mutaxassisning olib kelinishi barchasiga yechim bo‘la olmaydi. Kuperning tayinlovi tanlash tizimi va strategik reja yo‘q paytda ro‘y berdi. “Chet ellik mutaxassis istaganmidingiz? Mana sizga”, deyishdi.
Ayrim jurnalistlar Kuper tanqid ostiga olinsa hayron bo‘lishdi. Siz mana shuni xohlamaganmidingiz, deya gapirishdi. Avvalgi rahbariyatning shunday “advokat”laridan biri fikrlarimni boshqacha talqin qilgan holda meni “mot etmoqchi” bo‘ldi.
Shunday ekan, O‘FA hozirgi rahbariyatining vazifasi murabbiy tanlash vaqti kelganda, avvalgi rahbariyat qilgan xatoni takrorlamaslik bo‘ladi. Nomzodni tanlashdan avval terma jamoaning kuchli va kuchsiz tomonlarini o‘rganish, uning oldiga qanday maqsad va vazifalar qo‘yilishi hamda u mazkur lavozimga qay darajada loyiqligini tekshirish kerak.
Masalan, Feliks Sanchesning Qatar bosh murabbiyligiga qanday kelganini eslash mumkin. U Qatarga “Aspire” akademiyasini rivojlantirish loyihasi sabab kelgan. Keyinchalik u yoshlar terma jamoasi bilan 2014-yilgi Osiyo chempionatida g‘olib bo‘ldi. Tabiiyki, u faoliyatini olimpiya terma jamoasi boshqaruvida davom ettirdi va 2017-yilda bosh terma jamoa ustoziga aylandi. 2019-yilning yanvarida esa nima bo‘lganini eslatishga hojat yo‘q bo‘lsa kerak. Federatsiyaning uzoqni ko‘zlab ishlashi va barcha yoshdagi terma jamoalarni bir tizim ostida bog‘lash mana shunday bo‘ladi.
O‘zbekistonda nima bo‘lyapti? Siz to‘rtta asosiy terma jamoa murabbiylari bitta o‘yin uslubining tarafdori ekaniga ishonasizmi?”, — deydi Nikimbayev.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)