Алишер Никимбаев: Куперни истеъфога чиқариш ҳозир қимматга тушади

Айни дамда Қатарда фаолият юритаётган ўзбекистонлик футбол мутасаддиси Алишер Никимбаев Ўзбекистон терма жамоасининг Фаластинга қарши ўйиндаги мағлубиятига муносабат билдирди.

«Натижа мен учун ёқимсиз кутилмаган воқеа бўлди. Эктор Купернинг мураббийлик салоҳияти ва айниқса тактик услубига шубҳа билан қараб келган бўлсам-да, бу ўйинда футболчиларнинг савияси ғалаба учун етарли бўлади деб ўйлаган эдим. Аслида эса бу камлик қилди.

Энди нима қилиш керак? Мазкур қийин саволга ЎФАнинг ҳозирги раҳбарияти жавоб бериши керак. Аввалги раҳбариятдан уларга терма жамоанинг мақсад, вазифа ва услубига мос тушмайдиган мураббий мерос бўлиб қолди. Шу билан бирга уни истеъфога чиқариш жуда қимматга тушади.

Демак, агарда Куперни истеъфога чиқариш қарори қабул қилинса, бунга пул керак бўлади. Бунинг устига янги мураббий жалб қилиш учун ҳам маблағ талаб қилинади. Билишимча, бунинг учун ЎФАда пул йўқ. Аввалги раҳбарият жуда дабдабали ҳаёт кечирган ва нафақат Мираброр Усмонов давридан қолган (айрим маълумотларга кўра 2 миллион доллар атрофида) пуллар, балки сўнгги икки йил ичида ЎФА ҳисобига тушган бошқа маблағларни ҳам ишлатиб юборган.

Молиявий ҳолат эса Куперга ўринбосар топиш масаласини қийинлаштиради. Пулни тежаш мақсадида маҳаллий мутахассис тайинланиши ҳам мумкин. Айнан ким, барча машҳур кишилар терма жамоани бошқаришга улгурди, қолганлари ушбу лавозимни эгаллашга қодирмикин? Ёки мухлислар, журналистлар ва мутахассислар бир неча йилдан бери талаб қилаётган чет эллик мураббийга ишониш керакми?

Купренинг тайинланиши шу кўрсатдики, чет эллик мутахассиснинг олиб келиниши барчасига ечим бўла олмайди. Купернинг тайинлови танлаш тизими ва стратегик режа йўқ пайтда рўй берди. «Чет эллик мутахассис истаганмидингиз? Мана сизга», дейишди.

Айрим журналистлар Купер танқид остига олинса ҳайрон бўлишди. Сиз мана шуни хоҳламаганмидингиз, дея гапиришди. Аввалги раҳбариятнинг шундай «адвокат»ларидан бири фикрларимни бошқача талқин қилган ҳолда мени «мот этмоқчи» бўлди.

Шундай экан, ЎФА ҳозирги раҳбариятининг вазифаси мураббий танлаш вақти келганда, аввалги раҳбарият қилган хатони такрорламаслик бўлади. Номзодни танлашдан аввал терма жамоанинг кучли ва кучсиз томонларини ўрганиш, унинг олдига қандай мақсад ва вазифалар қўйилиши ҳамда у мазкур лавозимга қай даражада лойиқлигини текшириш керак.

Масалан, Феликс Санчеснинг Қатар бош мураббийлигига қандай келганини эслаш мумкин. У Қатарга «Aspire» академиясини ривожлантириш лойиҳаси сабаб келган. Кейинчалик у ёшлар терма жамоаси билан 2014 йилги Осиё чемпионатида ғолиб бўлди. Табиийки, у фаолиятини олимпия терма жамоаси бошқарувида давом эттирди ва 2017 йилда бош терма жамоа устозига айланди. 2019 йилнинг январида эса нима бўлганини эслатишга ҳожат йўқ бўлса керак. Федерациянинг узоқни кўзлаб ишлаши ва барча ёшдаги терма жамоаларни бир тизим остида боғлаш мана шундай бўлади.

Ўзбекистонда нима бўляпти? Сиз тўртта асосий терма жамоа мураббийлари битта ўйин услубининг тарафдори эканига ишонасизми?», — дейди Никимбаев.