Davlat ekologiya qo‘mitasi raisi o‘rinbosari: Daraxtlarning noqonuniy kesilishiga qarshi kurashda inqilob qiladigan vaqt keldi
O‘zbekistonda daraxtlarning noqonuniy kesilishining oldini olish bo‘yicha inqilob qiladigan vaqt kelgan. Bu haqda 30-avgust kuni jurnalistlar bilan bo‘lib o‘tgan ochiq muloqotda Ekologiya va atrof-muhitni muhofaza qilish davlat qo‘mitasi raisi o‘rinbosari O‘ktam O‘tayev aytib o‘tdi, deya xabar bermoqda “Daryo” muxbiri Musulmonbek Ibrohimov.
Kuni kecha bir guruh jurnalist va blogerlar O‘zbekistonda daraxtlarning ommaviy kesilishining oldini olish bo‘yicha mamlakat rahbariyatiga ochiq xat yo‘llagan edi. Unda mamlakat rahbarlaridan shahar va qishloqlardagi daraxtlarning nazoratsiz kesilishi bilan bog‘liq ekologik muammoni zudlik bilan hal etish so‘ralgan.
O‘tayevning aytishicha, daraxtlar masalasida Qurilish vazirligi va Ekologiya qo‘mitasi o‘rtasida ko‘plab tortishuvlar bo‘lmoqda. Shuning uchun 30-iyun kuni jurnalistlar bilan tashkil etilgan muloqotga muammoni ochiq muhokama qilish uchun Qurilish vazirligi mutasaddilari taklif qilingan, lekin vazirlikdan hech kim kelmagan.
“Ekologiya qo‘mitasi o‘zi tashabbus bilan chiqib, bugungi uchrashuvni tashkil qildi, masalani yechish yo‘llarini zimmamizga olyapmiz. Daraxtlarning noqonuniy kesilishi masalasida inqilob qiladigan vaqt keldi. Ochiq xat yozganingiz uchun sizlarga rahmat. Toshkent shahri, Toshkent va Farg‘ona viloyatlari — eng muammoli hududlarimiz. Buxoro, Navoiy, Surxondaryo, Qoraqalpog‘istonda ham bu masala dolzarb”, — dedi O‘ktam O‘tayev.
O‘tayevning qo‘shimcha qilishicha, qonun hamma uchun barobar. “Qonunning rivojlanishi uchun davrlar, jamiyatdagi o‘zgarishlar sababchi bo‘ladi. Biz ochiq xatni hukumat, parlament, Prezident darajasida ko‘rib chiqib, qonunchilikka o‘zgartirishlar kiritishga tayyormiz”, — dedi qo‘mita raisi o‘rinbosari.
