Ўзбекистонда дарахтларнинг ноқонуний кесилишининг олдини олиш бўйича инқилоб қиладиган вақт келган. Бу ҳақда 30 август куни журналистлар билан бўлиб ўтган очиқ мулоқотда Экология ва атроф-муҳитни муҳофаза қилиш давлат қўмитаси раиси ўринбосари Ўктам Ўтаев айтиб ўтди, дея хабар бермоқда «Дарё» мухбири Мусулмонбек Иброҳимов.
Куни кеча бир гуруҳ журналист ва блогерлар Ўзбекистонда дарахтларнинг оммавий кесилишининг олдини олиш бўйича мамлакат раҳбариятига очиқ хат йўллаган эди. Унда мамлакат раҳбарларидан шаҳар ва қишлоқлардаги дарахтларнинг назоратсиз кесилиши билан боғлиқ экологик муаммони зудлик билан ҳал этиш сўралган.
Ўтаевнинг айтишича, дарахтлар масаласида Қурилиш вазирлиги ва Экология қўмитаси ўртасида кўплаб тортишувлар бўлмоқда. Шунинг учун 30 июнь куни журналистлар билан ташкил этилган мулоқотга муаммони очиқ муҳокама қилиш учун Қурилиш вазирлиги мутасаддилари таклиф қилинган, лекин вазирликдан ҳеч ким келмаган.
«Экология қўмитаси ўзи ташаббус билан чиқиб, бугунги учрашувни ташкил қилди, масалани ечиш йўлларини зиммамизга оляпмиз. Дарахтларнинг ноқонуний кесилиши масаласида инқилоб қиладиган вақт келди. Очиқ хат ёзганингиз учун сизларга раҳмат. Тошкент шаҳри, Тошкент ва Фарғона вилоятлари — энг муаммоли ҳудудларимиз. Бухоро, Навоий, Сурхондарё, Қорақалпоғистонда ҳам бу масала долзарб», — деди Ўктам Ўтаев.
Ўтаевнинг қўшимча қилишича, қонун ҳамма учун баробар. «Қонуннинг ривожланиши учун даврлар, жамиятдаги ўзгаришлар сабабчи бўлади. Биз очиқ хатни ҳукумат, парламент, Президент даражасида кўриб чиқиб, қонунчиликка ўзгартиришлар киритишга тайёрмиз», — деди қўмита раиси ўринбосари.
Изоҳ (0)