O‘zbekiston Bosh konsulxonasi ma’lumotiga ko‘ra, 16-avgust kuni Sankt-Peterburg shahrining Frunze tumanida sodir bo‘lgan ommaviy mushtlashuv natijasida O‘zbekistonning uch nafar fuqarosi travmatik quroldan jarohatlangan, deb xabar beradi TIV matbuot xizmati.
Ulardan biri I.I. Janelidze nomidagi Sankt-Peterburg tez yordam ilmiy-tadqiqot institutiga joylashtirilgan. Uning sog‘lig‘i o‘rta darajada og‘ir deb baholanmoqda.
Huquqni muhofaza qiluvchi organlar tomonidan tergovgacha bo‘lgan tadbirlar olib borilmoqda.
“Bosh konsulxona tegishli tashkilotlar bilan aloqa o‘rnatgan hamda mazkur vaziyatni o‘z nazoratiga olgan.
Konsullik-huquqiy departamenti eslatib o‘tadiki, Rossiyaning Shimoli-g‘arbiy federal okrugi (Arxangelsk viloyati, Kaliningrad viloyati, Kareliya Respublikasi, Komi Respublikasi, Leningrad viloyati, Murmansk viloyati, Nenets avtonom okrugi, Novgorod viloyati, Pskov viloyati, Sankt-Peterburg shahri, Vologoda viloyati) hududida joylashgan fuqarolarimiz zarur vaziyatlarda mamlakatimizning Sankt-Peterburg shahridagi Bosh konsulxonasiga quyidagi telefon raqami orqali murojaat qilishlari mumkin: +7-965-029-41-49”, deyiladi xabarda.
Avvalroq Peterburgda O‘zbekiston va Ozarbayjon fuqarolari ishtirokida ommaviy mushtlashuv yuz bergani haqida xabar berilgan edi.
Izoh (0)