O‘zbekistondagi ayrim banklar 16-avgust kuni dollarni 9100 so‘mdan sotishni, 9055 so‘mdan sotib olishni boshladi. So‘nggi uch kun ichida banklarda dollar kursi kamida 100 so‘mga oshdi, deb yozmoqda Spot.
Amerika valyutasi ham birjada o‘sib bormoqda. O‘zbekiston valyuta birjasidagi savdolar yakuni bo‘yicha 15-avgust kuni dollar 9061 so‘mni tashkil etgan bo‘lib, bu 14-avgustdagi narxdan 45 so‘mga ko‘p.
Avgust oyi boshida keskin pasaygan birjadagi savdo hajmi asta-sekin tiklanishda davom etmoqda hamda 15-avgust natijalariga ko‘ra, 111 million dollarni tashkil etdi. Taqqoslash uchun, 8-avgustdan 13-avgustgacha savdo hajmi 95 million dollarni tashkil qildi. Bunda dollar 8950 so‘m atrofida savdo qilingan.
Markaziy bank 16-avgustdan xorijiy valyutalarning so‘mga nisbatan yangi qiymatini belgilagan edi. Unda dollar 179 so‘mga ko‘tarilib, 9061 so‘mga yetgani ma’lum qilingan.
Izoh (0)