13-avgustdan boshlab Amerika idoralari uchun Xitoyning Huawei va ZTE telekommunikatsiya kompaniyalari mahsulotlarini xarid qilmaslik va ularning xizmatidan foydalanmasligi to‘g‘risidagi taqiq kuchga kirdi, deb xabar beradi “RIA Novosti”.
Idoralar ro‘yxatidan AQSh Mudofaa vazirligi, Umumiy xizmatlar idorasi va NASA o‘rin olgan. Taqiqqa ko‘ra, AQSh idoralari endilikda Huawei va ZTE mahsulotlarini nafaqat to‘g‘ridan to‘g‘ri, balki ularga bog‘liq kompaniyalardan ham xarid qila olmaydi.
Hujjatga ko‘ra, “ayrim vaziyatlarda” idora rahbari ikki yil muddatga, shunda ham 2021-yilning 13-avgustidan uzoq bo‘lmagan vaqtga bir marta istisno qilishi mumkin. Buning uchun u Kongress qo‘mitalariga o‘z so‘rovini batafsil tushuntirib berishi lozim. Boshqa hollarda buni faqatgina AQSh milliy razvedka direktori amalga oshira oladi.
Bundan tashqari Hytera Communications Corporation, 34 Hangzhou Hikvision Digital Technology Company va Dahua Technology Company kompaniyalari ham taqiqqa tushgan.
AQSh hukumati Huawei kompaniyasini Xitoy razvedkasi va harbiylari bilan hamkorlikda ayblamoqda. Shuningdek, AQSh bir qator mamlakatlarni 5G aloqa tarmog‘iga o‘tishda Huawei qurilmalaridan foydalanmaslikka ko‘ndirmoqda.
Izoh (0)