Oliy Majlis Qonunchilik palatasi deputati Rasul Kusherboyev aholi murojaati asosida Yangiyo‘l tumani “Saxovat” mahallasi, Saxovat ko‘chasidagi namunaviy loyihalar asosida qurilgan uylarning ahvoli bilan tanishdi.
Shu yilning aprel oyida tugallanishi va’da qilingan uylar hamon to‘liq egalariga topshirilmaganligi va qurilishdagi sifatsiz ishlar haqida aholi vakillari o‘tgan haftada Yangiyo‘ldagi qabulxonamga kelib murojaat qilishgandi.Tajribamdan kelib chiqib aytishim mumkinki, murojaat joyida o‘rganilgandagina asl haqiqat namoyon bo‘ladi. Shu bois, qurilishga mas’ul ‘Qishloq qurilish invest’ IK va tuman hokimligi mas’ullarini joyiga taklif qilib, muammoni o‘rganib chiqdik.
Ochig‘i aholi vakillari noliganicha ham bor ekan: jami 76 ta uyning 60 ga yaqinida xonadon egalari u yoki bu darajada qurilish ishlaridan norozi, aksariyati qurilish-ta’mirlash ishlari sifatsiz bajarilgani uchun uylarni qabul qilib olishmagan. Shu bois, uylar hamon tabiiy gaz bilan ta’minlamagan, yangi ko‘cha chang to‘zon va shag‘aldan iborat bir ahvolda. Shuningdek, bir qator xonadonlardagi hammom, kotelniy, eshik, kanalizatsiya, hovli sahnidagi beton va elektr toki montaj ishlari qurilish talablariga mos olib borilmagan, ayrim quruvchi ustalar ish haqlarini ololmay sarson...
Barcha kamchiliklar bilan tanishgach, aholi e’tirozlari bejizga emasligini tushundik. So‘ng shu yerning o‘zida tez muddatda qurilish-ta’mirlash ishlarini oxirigacha yetkazish bo‘yicha ishlar rejalashtirib olindi.
Har tugul bu safar bir-birimizni yaxshi tushundik shekilli ‘Qishloq qurilish invest’ mas’ullari e’tiborsizlik qilgan qurilish ishlarini qattiq nazoratga olib, kamchiliklarni bartaraf qilishga kirishishdi. Hokimlik ham ertalabdan va’da qilingan ishlarni boshlab yuboribdi. Nasib qilsa shunday ruxda ohirigacha boradi.
Deputatlik nazorati degan gapdan kelib chiqib, ishlar oxiriga yetmaguncha har hafta bir oyog‘imiz shu yerda bo‘ladi endi.
Rasul Kusherboyev, Oliy Majlis Qonunchilik palatasi deputati
Izoh (0)