O‘zbekiston Xotin-qizlar qo‘mitasi Andijondagi “ko‘zbo‘yamachilik” haqida tarqatilgan ma’lumotlarni rad etdi

O‘zbekiston Xotin-qizlar qo‘mitasi raisi o‘rinbosari Mukarram Nurmatova Andijondagi “ko‘zbo‘yamachilik” haqida OAVda tarqalgan xabarlarni rad etdi. Bu haqda O‘zbekiston Xotin-qizlar qo‘mitasi vakillari jurnalistlar bilan bo‘lib o‘tgan muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.

Eslatib o‘tamiz, Andijon shahrida ijtimoiy himoyaga muhtoj bir necha ayollarga kottej berish sharti bilan “Mustaqillik tikuvchilik majmuasi”ga ishga qabul qilingani, 2019-yilning fevral—mart oylarida viloyat hokimligi mas’uli korxonaning uy-joyga muhtoj olti nafar ishchisiga yangi qurilayotgan kottejlardan sovg‘a sifatida bittadan berilishini ma’lum qilgani, ularning bepul kottej olgani to‘g‘risida “O‘zbekiston 24” telekanalida lavha ham efirga uzatilgani haqida avval xabar berilgan edi.

Prezident Shavkat Mirziyoyevning Andijonga tashrifi vaqtida ishchilardan faqat bir nafariga kottej sovg‘a qilingan. Tashrifdan so‘ng viloyat hokimligi mas’uli talabiga ko‘ra, qolgan besh nafar ishchi yangi qurilayotgan to‘rt qavatli uylardan xonadon ajratish va’da qilingan holda kottejlardan ko‘chirilgan. Buni o‘rganib chiqqan Bosh prokuratura viloyat hokimligi mutasaddilari besh nafar ayolga kottej berilishini va’da qilib, yakunda ularga kottej ajratmasdan, ko‘zbo‘yamachilik qilganini aniqlagan.

Axborot va ommaviy kommunikatsiyalar agentligida o‘tgan anjumanda O‘zbekiston Xotin-qizlar qo‘mitasi rahbariyati Andijondagi “ko‘zbo‘yamachilik” bo‘yicha nima uchun izoh bermagani so‘raldi.

Bunga javoban O‘zbekiston Xotin-qizlar qo‘mitasi raisi o‘rinbosari Mukarram Nurmatova “ko‘zbo‘yamachilik” haqida tarqatilgan ma’lumotlar noto‘g‘riligini aytib o‘tdi.

“Ushbu masala haqida jurnalistlar tomonidan tarqatilgan dastlabki ma’lumotlardan keyin biz bunga katta e’tibor bermadik. Chunki, bu to‘g‘ri ma’lumot emas edi. Shaxsan o‘zim o‘sha ayollar bilan uchrashganman. Prezident tashrifidan oldin Andijonda yaxshi tashabbus bilan chiqilgandi. Aynan talablar bilan (‘ko‘zbo‘yamachilik’da aldangan ayollar — tahr.) chiqqan ayollarga Xotin-qizlar qo‘matasi tomonidan juda katta yangicha yondashuv asosida: jazo muddatini o‘tab chiqqan, jinoyatchilikka moyilligi bor va axloqi yaxshi bo‘lmagan ayollarni sexlarga joylashtirib, ishlab topgan pullari orqali uy-joylar ajratish rejalashtirgan. Ayollarga ko‘p qavatli uy qurilayotganidan xabarim bor edi. Uylarni borib ko‘rganman, juda ham katta imkoniyatlar, sharoitlar yaratilgan. Shuning uchun, biz masalani ikki tomondan o‘rganib hal qilamiz. O‘sha vaqtda masala chuqurlashib ketmasin, o‘z-o‘zidan viloyat miqyosida hal bo‘ladi, degan maqsadda alohida javob bermagan edik. Andijonda juda katta ish qilingan, odamlar o‘z ko‘zi bilan ko‘rib turibdi-ku, xalq o‘z bahosini beradi, degan maqsadda bu masalani chuqurlashtirmagan edik”, — dedi Mukarram Nurmatova.

O‘zbekiston xotin-qizlar qo‘mitasi raisi Elmira Bositxonova Andijon viloyati xotin-qizlar qo‘mitasi raisi gapini uyga muhtoj ayollar noto‘g‘ri tushunganini ta’kidladi.

“Hokim o‘rinbosari (Andijon viloyati xotin-qizlar qo‘mitasi raisi Manzura Yunusova — tahr.) ayollarni ishga jalb qilayotganda ‘ishlab kreditni to‘lashga imkoniyatinglar bo‘lganda mana shu uylardan sizlar ham olasizlar’ degan gapini u ayollar ‘menga shu yerdan uy berar ekan’, deb qabul qilgan. Bu yerda tushunmovchilik bo‘lgan. Hokim o‘rinbosari Manzura Fazliddinovna bilan gaplashdik: Xotin-qizlar qo‘mitasi fondidagi puldan ‘menga uy’, deganlarning hammasiga tarqatmasdan, ro‘yxat va tartib bilan taqsimlanishini e’tiborga olgan. Lekin u yerda tartiblar juda ham murakkab. Bizni prokuratura tekshiradi, kimga uy berish bo‘yicha qog‘ozga men imzo chekishim kerak. Bularnining hammasi tahlil qilinishi lozim”, — dedi Bositxonova.

Xotin-qizlar qo‘mitasi raisi ushbu masalani birinchi ishga kirishgan kuniyoq o‘rganishni boshlagani, lekin “ko‘zbo‘yamachilik” bo‘yicha prokuraturaning munosabatidan xabari yo‘qligini qo‘shimcha qildi.