15-iyul, dushanba kuni Toshkentda O‘zbekiston futbol assotsiatsiyasining navbatdan tashqari konferensiyasi bo‘lib o‘tdi.
Konferensiya kun tartibidan O‘FA prezidenti, vitse-prezidentlar va Ijroiya qo‘mitasi a’zolarini saylash masalalari o‘rin olgan edi.
Unga ko‘ra, O‘zbekiston futbol assotsiatsiyasining prezidenti sifatida ishlab kelgan Ochilboy Ramatov o‘z xohishi bilan lavozimidan iste’foga chiqqanligi sababli, uning o‘rniga Toshkent shahar futbol assotsiatsiyasidan nomzod sifatida Abdusalom Azizov ko‘rsatildi.
Konferensiyada Azizov bir ovozdan O‘zbekiston futbol assotsiatsiyasi prezidenti lavozimiga saylandi.
Shuningdek, Ravshan Ermatov O‘zbekiston futbol assotsiatsiyasi birinchi vitse-prezidenti, tashkilot vitse-prezidenti sifatida Muhiddin Jo‘rayev saylandi.
Ma’lumot uchun, Abdusalom Azizov ayni damda Davlat xavfsizlik xizmati raisi ham hisoblanadi. U 2008—2009-yillarda O‘zbekiston futbol federatsiyasi vitse-prezidenti bo‘lgan. Bundan tashqari, Azizov O‘zbekiston ichki ishlar vaziri, Mudofaa vaziri lavozimlarida faoliyat yuritgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)