Amerikalik turist Vyetnamda qatl etilishi mumkin
Vyetnamda qo‘lga olinib, “davlat to‘ntarishini amalga oshirishga harakat”da ayblanayotgan AQSh fuqarosi iyun oyining oxirida sud qilinadi. Agarda sud uni aybdor deb topsa, jinoyatchi o‘lim jazosiga mahkum qilinishi mumkin, deb xabar beradi Forum Daily.
Maykl Nguen Vyetnam qamoqxonasida o‘tgan yilning iyulidan beri saqlab kelinmoqda. U ikki nafar faol bilan sayohat qilayotganida qo‘lga olingan.
Mayklning AQShda istiqomat qiladigan oilasi uning aybini inkor etib, erkakning qo‘poruvchi guruhlarga hech qanday aloqasi yo‘qligini ta’kidlamoqda. To‘rt nafar qizning otasi Vyetnamni 1975-yilda kommunistik to‘ntarish vaqtida tark etib, AQShga qochib borgan.
Sud ishi 24—25-iyun kunlari Xoshiminda bo‘lib o‘tadi.
Fevral oyida qo‘lga olingan shaxsning turmush o‘rtog‘i Xelen Nguen AQSh prezidenti Donald Tramp va Kongressga mazkur vaziyat yuzasidan murojaat yo‘llagan edi.
Vyetnamda bundan uch yil oldin hukumat almashganidan so‘ng, dissidentlarga (boshqacha fikrlovchi, maslak-maqsadi boshqa odam) qarshi ta’qiblarni kuchaytirgan.
Amnesty International ma’lumotlariga ko‘ra, ayni vaqtda Vyetnamda 128 nafar asir mavjud bo‘lib, ular orasida advokatlar, huquq himoyachilari va demokratiya tarafdorlari ham bor.
