Toshkentda fan olimpiadalarining respublika bosqichi g‘oliblari aniqlandi

Toshkent shahridagi Turin politexnika universitetida respublika fan olimpiadasining yopilish marosimi va g‘oliblarni taqdirlashga bag‘ishlangan tadbir bo‘lib o‘tdi. Bu haqda Xalq ta’limi vazirligi axborot xizmati ma’lum qildi.

Respublika bosqichi yakuniga ko‘ra, jami 18 ta fandan 53 nafar o‘quvchi g‘olib deb topildi. Shundan 20 nafari 1-o‘ringa, 18 nafari 2-o‘ringa va 15 nafari 3-o‘ringa sazovor bo‘ldi. Jamoalar hisobida esa Toshkent shahri 12 ta sovrinli o‘rin bilan 1-o‘rinni, Navoiy viloyati va Qoraqalpog‘iston Respublikasi 5 ta o‘rin bilan 2-o‘rinni, Andijon, Namangan, Sirdaryo va Surxondaryo viloyatlari 4 ta o‘rin bilan 3-o‘rinni egallashga muvaffaq bo‘ldi.

G‘oliblar orasidan 23 nafari akademik litsey, 8 nafari kasb-hunar kollejlari, 22 nafari umumta’lim maktablari o‘quvchilaridir.

Olimpiadada fanlardan 1-, 2- va 3- o‘rinlarni egallagan o‘quvchilar oliy ta’lim muassasalariga test sinovlarisiz hamda qo‘shimcha imtihonlarsiz kirish imtiyoziga ega bo‘ldi.