Qoraqalpog‘istonlik marhum jurnalist Furqat Yusupovga “Oltin qalam” mukofoti beriladi

Qoraqalpog‘istonlik marhum jurnalist Furqat Yusupovga “Oltin qalam” mukofoti beriladi. Bu haqda uning ukasi Iskandar Yusupov ma’lum qildi.

“Akam shiddat bilan rivojlanayotgan bugungi davrda OAVning roli va xizmati juda katta ekanligini, internet jurnalistikasi sohasida tezkorlikni kuchaytirish, ustuvor mavzular ustida izlanishi kerakligini ko‘p aytardi. Afsus, maqsadi sari ozgina yurib ulgurdi, xolos. Bugun uning mehnatlari baholanib, o‘zi orzu qilgan mukofot sovrindori bo‘lganidan nihoyatda hursandman”, — deyiladi “KRuz.uz” saytida e’lon qilingan matnda.

Iskandar Yusupov “Oltin qalam” milliy mukofoti uchun O‘zbekiston jurnalistlar ijodiy uyushmasiga Yusupovlar oilasi nomidan minnadorlik bildirgan.