“Liverpul”—“Chelsi”. APL 34-tur o‘yinlari anonsi

12-aprel, juma kuni futbol bo‘yicha Angliya premyer ligasining 34-tur o‘yinlariga start berildi.

Turning dastlabki o‘yinida “Lester” o‘z maydonida “Haddersfild”ni qabul qildi.

Uchrashuvdagi yagona gol 32-daqiqada mehmon jamoa a’zosi Ayoze Peres tomonidan kiritildi. Natijada “Nyukasl” safarda kechgan bahsda Brendan Rojers shogirdlarini kichik hisobda mag‘lub etdi (1:0).

13-aprel, shanba kuni Maurisio Pochettino qo‘l ostidagi Londonning “Tottenhem” jamoasi “Haddersfild”ga qarshi maydonga tushadi. Bellashuv Toshkent vaqti bilan soat 16:30 da boshlanadi. Eslatib o‘tamiz, “shporlar” 9-aprel kuni bo‘lib o‘tgan Yevropa Chempionlar Ligasi 1/4 finalining ilk uchrashuvida “Manchester Siti”ni maglub etgandi (1:0).

So‘nggi turda “Vulverhempton”ga imkoniyatni boy bergan (1:2) Ole-Gunnar Sulsher boshliq “Manchester Yunayted” “Old Trafford”da “Vest Hem”ni sinovdan o‘tkazadi. Bellashuvga 21:30 da start beriladi.

14-aprel, yakshanba kuni musobaqa jadvalida 2-o‘rinda borayotgan “Manchester Siti” “Kristal Pelas” maydoniga safar qiladi. O‘yin soat 18:05 da boshlanishi belgilangan. Ma’lumot uchun, “mankunianlar” 33-turda “Kardiff”ni 2:0 hisobida taslim qilgandi.

Turning markaziy bahsi “Enfild” stadionida bo‘lib o‘tadi. Unda “Liverpul” klubi Londonning “Chelsi” jamoasini qabul qiladi. Uchrashuv soat 20:30 da start oladi.

Ta’kidlash joiz, mersisaydliklar 9-aprel kuni bo‘lib o‘tgan Yevropa Chempionlar Ligasi 1/4 finalining dastlabki o‘yinida Portugaliyaning “Portu” jamoasini mag‘lubiyatga uchratgan bo‘lsa (2:0), “aristokratlar” Yevropa Ligasi chorak finalining ilk o‘yinida “Slaviya Praga”ni kichik hisobda yutgandi (1:0).

15-aprel, dushanba kuni turning oxirgi bellashuvida Unai Emeri boshqaruvidagi “Arsenal” jamoasi “Uotford” bilan bahsga kirishadi. Ma’lumot uchun, “to‘pchilar” 63 ochko to‘plagan holda 5-o‘rinda bormoqda.