Uzbekistan Airways 16-aprel kuni Toshkent — Tbilisi yo‘nalishi bo‘ylab ilk reysni amalga oshiradi

Uzbekistan Airways 16-aprel kuni Toshkent — Tbilisi yo‘nalishi bo‘ylab ilk reysni amalga oshiradi. Bu haqda Tbilisi xalqaro aeroporti matbuot xizmati ma’lum qildi, deya xabar berdi Spot.

Reyslar haftasiga ikki marta — seshanba va yakshanba kunlari Airbus A320 aerobusida amalga oshiriladi.

Qayd etilishicha, ikki davlat o‘rtasidagi to‘g‘ridan-to‘g‘ri aviaqatnovlar SSSR tarqab ketganidan so‘ng to‘xtagan. Hozirda parvozlar uchinchi mamlakatlar orqali bajarilmoqda va Toshkentdan Tbilisigacha bo‘lgan uchish vaqti 8 soatdan ko‘proqqa cho‘ziladi.

Ma’lumot uchun, joriy yil birinchi choragida O‘zbekistondan Gruziyaga safarlar soni rekord darajada ko‘payib, 4,5 mingtadan oshgan. Bu o‘tgan yilning shu davriga nisbatan deyarli uch baravar ko‘p.