Internet tarmog‘ida patrul post xizmati xodimlarining ko‘cha tozalovchi bo‘lib ishlaydigan 57 yoshli Bahtiyor Mametovni muayyan yashash joyi bo‘lmagan shaxs deb atab, do‘pposlagani haqida xabar tarqaldi. IIV matbuot xizmati bu xabarning haqiqatga zid ekanligini ma’lum qildi.
Qayd etilishicha, 9-aprel kuni IIBga Yashnobod tumanining Aviasozlar 4-mavzesida joylashgan ko‘p qavatli uylarda yashovchi fuqarodan murojaat kelib tushgan. Unda fuqaro xonadonini mast holdagi notanish erkak taqillatayotgani aytgan. Voqea joyiga yetib kelgan profilaktika inspektori va Patrul post xizmati xodimlari o‘zini Bahtiyor Mametov deb tanishtirgan erkakni ko‘rgan.
Ushbu shaxs jamoat joylarida spirtli ichimliklar ichgani va jamoat tartibini buzgani uchun avvalroq bir necha marta Ichki ishlar organlariga keltirilgan.
Bahtiyor Mametov allaqachon sotib yuborilgan Mirzo Ulug‘bek tumanidagi uyda ro‘yxatdan o‘tgan bo‘lib, hozirda uning muayyan yashash joyi yo‘q va hech qayerda ishlamaydi. Shu sababli Ichki ishlar xodimlari unga Muayyan yashash joyiga ega bo‘lmagan shaxslarni reabilitatsiya qilish markaziga joylashtirishni taklif qilgan. Biroq u bu taklifni qat’iy rad etgan.
Bahtiyor Mametovdan yuzidagi g‘urralar haqida so‘ralganida, u shishlarning qanday paydo bo‘lganligini eslay olmasligini, ehtimol o‘zi bilan birga ichgan boshqa odamlar bilan janjallashishi oqibatida kelib chiqqanini aytgan.
Izoh (0)