Asaka tumanining Niyozbotir mahallasida viloyat ichki ishlar boshqarmasi boshlig‘i hamda O‘zbekiston Prezidentining Andijon viloyatidagi Xalq qabulxonasi mudiri fuqarolarning murojaatlari bo‘yicha sayyor qabul o‘tkazdi. Bu haqda viloyat IIB matbuot xizmati “Daryo”ga xabar berdi.
300 ga yaqin fuqaro ishtirok etgan qabul davomida yo‘llarni shag‘allash, elektr tayanchlari o‘rnatish va eskirgan transformatorlarni almashtirish, ichimlik va oqava suvi, imtiyozli kreditlar, suyultirilgan gaz balonlari ajratilishi, hududda maktabgacha ta’lim muassasasini qurish, fuqarolarning salomatligini tiklash va nogironlik aravachalari bilan ta’minlash, tadbirkorlik faoliyatini boshlash uchun yer ajratish bo‘yicha100 dan ortiq murojaat qabul qilingan.
— Mahalladoshlarimning iltimosi bilan ularning nomidan 2 ta ko‘chani shag‘allashtirish masalasi bo‘yicha murojaat qildim, — deydi Gumbaz mahallasida yashovchi fuqaro Munisaxon Jabborova. – Shuningdek, salkam ikki kilometrlik ko‘chamizning yarmiga shag‘al yotqizilgan, qolgan qismiga ham to‘kib berish imkoni bo‘lsa, yaxshi bo‘lardi. Qish qirovli kunlarda bizku bir amallarmiz, lekin bolalarimiz o‘qishga borishi uchun loy kechib o‘tishi kerak.
“Fidokor”lik Abduxalim ota Mamadaliyev ham huddi shu masala bo‘yicha murojaat qildi. Uning atishicha, o‘zi istiqomat qilayotgan ko‘chaning 2 km qismiga hatto shag‘al ham yotqizilmagan.
— Bir necha yillardan beri kasalligim bois chuqurlashtirilgan tibbiy ko‘rikdan o‘tish uchun yordam so‘rab keldim , — deydi Qurama mahallasida istiqomat qiluvchi Rahmonov Sharobiddin. – Bugungi sayyor uchrashuvda Toshkentga borib bepul davolanib kelishim uchun yo‘llanma berishlarini aytishdi. Bundan juda xursandman.
— Uyda bekor o‘tirmayin, deb tovuq boqa boshladim, - deydi Ariqbo‘yi mahallasidan tashrif buyurgan Muhabbatxon Xalilova. – Bugungi kunga kelib ularning soni 3 mingtaga yetdi. Kelgusida faoliyatimni kengaytirish niyatidaman. Buning uchun menga bank tomonidan 30 million so‘m mablag‘ zarur. Murojaati bo‘yicha menga “Har bir oila tadbirkor” davlat dasturi doirasida kredit ajratiladigan bo‘ldi.
Sayyor qabul davomida 50 dan ortiq murojaatlar joyida o‘z yechimini topgan bo‘lsa, qolgan masalalarni hal etish bo‘yicha mas’ullar biriktirildi.
Shuningdek, 2 ta tadbirkorga yer ajratish masalasi ijobiy hal qilingan bo‘lsa, 5 nafar imkoniyati cheklangan shaxsga nogironlik aravachalari topshirildi.
Qabul doirasida tuman ko‘p tarmoqli markaziy poliklinikasi shifokorlari tomonidan chuqurlashtirilgan tibbiy ko‘riklar tashkil qilinib, 78 nafar fuqaroga tibbiy xizmatlar ko‘rsatildi. Bo‘sh ish o‘rinlari mehnat yarmarkasida natijasida esa 73 nafar fuqaroga ishga joylashish uchun yo‘llanmalar berildi.
Izoh (0)