Toshkentdagi “Yoshlar ijod saroyi”da “Ta’lim va mutaxassislik” XX xalqaro ko‘rgazmasi bo‘lib o‘tmoqda. Bu haqda “Daryo”ga Yoshlar media markazi ma’lum qildi.
Ko‘rgazma ta’lim va bandlik yo‘nalishlarida tashkil etilgan bo‘lib, unda Amerika, Xitoy, Fransiya, Hindiston, Yaponiya, Germaniya, Latviya, Chexiya, Polsha, Angliya, Malayziya, Vengriya, Ispaniya, Rossiya, Kanada, Shveysariya, Singapur kabi davlatlardagi 70 ga yaqin nufuzli oliy o‘quv yurti va ularning O‘zbekistondagi filiallari, 40 dan ortiq O‘zbekistonda faoliyat yuritayotgan oliy ta’lim muassasasi, 40 dan ortiq xorijda ta’lim olishga ko‘maklashuvchi tashkilot, nodavlat ta’lim muassasasi hamda o‘quv kursi ishtirok etmoqda.
—Hozirda 570 nafar o‘zbekistonlik talaba AQShda tahsil olmoqda. Biz ularning safini yanada kengaytirmoqchimiz. Chunki dunyoning bir qator nufuzli oliy ta’lim muassasalari aynan Amerikada joylashgan. Shu sababli o‘zbekistonlik talabalarda bizning mamlakatda o‘qish ishtiyoqi baland, — deydi Amerikaning O‘zbekistondagi elchixonasi matbuot xizmati boshlig‘i Syuzanna Vud. — O‘zbekistondan o‘qishga borayotgan talabalar asosan biznes, muhandislik va texnologiyalar bo‘yicha tahsil oladi. Magistratura yo‘nalishida o‘qimoqchi bo‘lganlar ham ko‘pchilikni tashkil etadi.
Shuningdek, O‘zbekiston yoshlar ittifoqi qoshidagi markazlar tomonidan yoshlarda tadbirkorlik ko‘nikmalarini shakllantirish, axborot texnologiyalari sohasidagi bilimlarini oshirish va xorijiy tillarni o‘rgatishga qaratilgan bepul to‘garaklar va o‘quv kurslari to‘g‘risidagi taqdimotlar o‘quvchilar, abituriyentlar va talabalarda qiziqish uyg‘otdi.
— Ushbu ko‘rgazmaga o‘zbekistonlik yoshlarni Germaniyada ta’lim jarayonlari, ilmiy izlar olib borish va mavjud stipendiyalar bilan tanishtirish uchun keldik, — deydi Germaniyaning O‘zbekistondagi elchixonasi vakili Simon Kretchmer. — Bu ko‘rgazmada bir necha yildan buyon qatnashib kelyapmiz. Ishtirokimiz davomida mamlakat yoshlarining ilm olishga qiziqishi, ertangi kuni, kelajagi uchun harakatdaligiga guvoh bo‘ldim.
Tadbir doirasida bandlikka ko‘maklashuvchi markazlar, yirik kompaniyalar ishtirokida “Bo‘sh ish o‘rinlari mehnat yarmarkasi” tashkil etilib, unda Koreya xalqaro hamkorlik agentligi (KOICA) hamda Tashqi mehnat migratsiyasi masalalari agentligi ham qatnashdi.
Ma’lumot uchun, ko‘rgazmaga birinchi kunning o‘zida 3 ming nafardan ortiq yosh keldi.
Izoh (0)