O‘tib borayotgan hafta O‘zbekiston hayotida o‘zgarishlarga boy bo‘ldi. Asosiy voqealar qurilish, tashkil etish va tekshiruvga oid xabarlardir. “Daryo” haftalik dayjestini boshladik.
* * *
Hafta boshida taniqli xonanda Ozoda Nursaidovaning bevaqt o‘limiga oid tarqalgan yolg‘on-yashiq xabarlarga chek qo‘yildi. Uning singlisi xonanda shifoxonada ekanligini jurnalistlarga ma’lum qildi. Nursaidova 2000-yillarning mashhur qo‘shiqchisi bo‘lib, hanuzgacha muxlislari uning taqdiri bilan qiziqadi.
* * *
1974-yilda qurilib, Toshkent mehmondo‘stligining o‘ziga xos ramziga aylangan “O‘zbekiston” mehmonxonasi sotuvga qo‘yildi. Savdo ochiq o‘tkaziladi. Mehmonxonaning boshlang‘ich narxi 33 million dollar etib belgilandi.
* * *
MIB energiyadan antiqa usulda foydalanayotgan fuqarolarni aniqlab, bir nechta fotosuratlarini ulashdi. Unda moyli elektr isitkich ustida yelim idishda suv isitayotgan, oddiy tunuka pechkaga to‘g‘ridan to‘g‘ri gaz ulangan, shuningdek, qo‘lbola gazso‘rg‘ich yordamida gaz tortayotgan holatlar aks etgan. Aytish joizki, bu holatlar qishda energiya tanqisligi sharoitida yashayotgan fuqarolar uchun antiqa emas, kundalik oddiy holdir.
* * *
Hafta o‘rtalarida tinimsiz yog‘gan yomg‘ir Qarshi shahri ko‘chalarini suvga to‘ldirdi. “Daryo” Qarshining ko‘lga aylangan ko‘cha va mahallalari fotosuratlarini chop etdi. Ijtimoiy tarmoqlar “Qashqadaryoning daryosi” mavzuidagi mutoyibalar bilan boyidi. Yomg‘ir ne’matidan Buxoro shahri ko‘chalari ham benasib qolmadi.
* * *
Ravon kompaniyasining Rossiya bozoridagi hissasi nolga tushdi. O‘tgan yilning yanvarida Rossiyada 1,5 mingta mashina sotgan o‘zbek avtokompaniyasi ketma-ket sakkiz oydan beri sota olgani yo‘q. Eslatib o‘tamiz: 2018-yilning may oyida prezident Shavkat Mirziyoyev GM Uzbekistan Asaka avtomobil zavodi haqida “nomigagina, hech kimga foydasi yo‘q”, deb aytgan.
* * *
Rishtonda dinozavrga o‘xshab ketadigan hayvonning suyak qoldiqlari topildi. U kenguru va tuyaqushni ham eslatadi. Ayrim kuzatuvchilar uni dinozavr qoldig‘i deb hayratlanmoqda. Biroq biolog-tadqiqotchi Baxtiyor Sheraliyevning fikricha, suyaklarning dinozavrga aloqadorligi yo‘q.
* * *
O‘zbekiston moliya olamida katta tarixiy yangilik yuz berdi: birinchi marta 1 milliard dollarlik yevrobondlar joylashtirildi. 5 yillik 500 million dollarlik yevrobondlar 4,75 foizdan, 10 yillik 500 million dollarlik yevrobondlar esa 5,375 foizdan joylashtirilgan. Kuzatuvchilarning fikricha, bu O‘zbekistonning juda muvaffaqiyatli qadami bo‘ldi. Yevrobond oddiy tilda aytganda, avvaldan bizga tanish obligatsiya singari ishlaydi, ya’ni yevrobond xarid qilib, kompaniyaga ma’lum muddatga mablag‘ berasiz, evaziga esa yillik foydani qo‘lga kiritasiz.
* * *
Gulnora Karimovaning o‘g‘li Instagram-sahifasida onasiga bosim ko‘rsatilayotgani haqida yozgan edi. Ammo Bosh prokuratura matbuot xizmati “Daryo” saytiga bu iddao asossizligini ma’lum qildi va Karimovaga yaxshi sharoit yaratilganligini bildirdi.
* * *
Qo‘qon shahrida Milliy gvardiya xodimining tekshiruv chog‘ida uyushtirgan nayrangi fosh bo‘ldi. Avvalroq tarqalgan videoda Milliy gvardiya xizmatchisi shahardagi karaoke barga kirib, yostiq ostiga pichoq yashirib, xonadan chiqqani, saldan keyin esa hamrohlari bilan qaytib kirib, go‘yoki “topib olgani” ko‘rsatilgan, kadr ortida so‘zlangan voqea sharhida milliy gvardiyachi xodimining tuhmati fosh etilgan edi. Voqea yuzasidan tekshiruv qo‘zg‘atilgan va tuhmatchi xodimga jazo qo‘llanib, safdan chetlatilgan.
* * *
Kelasi haftadan boshlab O‘zbekistonda yuz ming so‘mlik pul muomalaga chiqarilishi ma’lum qilindi. Yuz ming so‘mlik banknotning yuzasida ulug‘ olim Mirzo Ulug‘bekning rasmi bo‘lib, quyosh tizimi sayyoralari va astronomik uskuna aks etgan. Yangi kupyura maxsus himoyalangan qog‘ozda 3D effektli tasvirlar va bo‘rtma yozuvlar bilan chop etiladi.
* * *
O‘zbekistonda Akfa nodavlat universitetini tashkil etish to‘g‘risidagi hukumat qarori qabul qilindi. Universitet MChJ shaklida faoliyat yuritadi. Unda fundamental, tibbiyot, aniq va gumanitar fanlar sohasidagi mutaxassislar tayyorlanadi. Bitiruvchilariga O‘zbekistonda oliy ma’lumot sifatida e’tirof etiladigan diplom beriladi.
Izoh (0)