Joriy yil 19—22-mart kunlari Ispaniyaning Saragosa shahrida bo‘lib o‘tadigan “Figan-2019” xalqaro ko‘rgazmasida ishtirok etish uchun fermer xo‘jaliklari rahbarlari tayyorgarlik ko‘rmoqda, deb yozadi O‘zA.
— Saragosada bo‘ladigan bu ko‘rgazma qishloq xo‘jaligi sohasida har ikki yilda bir marotaba o‘tkaziladigan dunyodagi eng yirik maydonlardan biri hisoblanadi, – deydi O‘zbekiston fermer, dehqon xo‘jaliklari va tomorqa yer egalari kengashi huzuridagi “Qishloq biznesi uchun maslahat” unitar korxonasi direktori F.Fazliyev. – Unda agroenergiya, chorvachilik, chorva mollarining sog‘ligini saqlash, ularni oziqlantirish va genetikasi, o‘rmon xo‘jaligi, baliqchilik, mahsulotlarni qayta ishlashga oid texnologiyalar namoyish qilinadi. Shuning uchun ham u soha mutaxassislari uchun muhim ko‘rgazmalaridan biri hisoblanadi.
Ko‘p tarmoqli fermer xo‘jaliklari faoliyatida bunday ko‘rgazmalarning muhimligini inobatga olib, ilg‘or fermerlarimizni mana shu ko‘rgazmaga safarbar qilmoqdamiz. Zero, bunday ko‘rgazmalar mamlakat sanoatining ham rivojlanishida muhim rol o‘ynaydi.
Qayd etish joizki, “Qishloq biznesi uchun maslahat” unitar korxonasining asosiy faoliyati fermer, dehqon xo‘jaligi rahbarlarini sohaga oid ilm-fan yutuqlarining zamonaviy, eng so‘nggi yangiliklari bilan oshno qilishdek ulug‘ maqsadlarga yo‘g‘rilgan. Ushbu tashkilotda bugungi kundagi ishlar aynan shu talabdan kelib chiqib tashkil etilgan.
— Ilm-fanning bugungi kundagi taraqqiyoti har bir soha vakillaridan tinimsiz o‘qish, izlanishni talab qiladi, – deydi F.Fazliyev. – Biz ham shu tamoyilni o‘zimizga ustuvor vazifalardan biri qilib belgilab olganmiz. Fermer va dehqon xo‘jaliklari rahbarlarining malakasini tinimsiz oshirish, dunyodagi ilg‘or tajribalarni o‘rgatish borasida bir qator yumushlarni amalga oshirmoqdamiz.
Izoh (0)