Abdulla Qodiriyning “O‘tkan kunlar” romanini ingliz tiliga tarjima qilishga 15 yil umrini bag‘ishlagan amerikalik Mark Riz kitobni chop etishga yordam so‘ramoqda.
Arizonalik tilshunos Mark Riz 24 yil avval O‘zbekistonga kelgan. Mark Riz turli vazifalarda ishlagan — Tinchlik korpusi, akademik, tarjimon. Uning turmush o‘rtog‘i ham Toshkentdan.
Mark Riz Abdulla Qodiriyning “O‘tgan kunlar” romanining tarjimasini 2002-yilda, Toshkentda aspirant bo‘lib yurgan paytida boshlagan. Romanni tarjima qilishga uni ilhomlantirgan narsa — Qo‘qonda yashab, ishlab yurgan davrini so‘zlar bilan ifodalashga ojizligi, “O‘tgan kunlar” esa, o‘sha hislarni aniq-tiniq ifoda etgani hamda amerikaliklarga murakkab, serqirra, ko‘p ma’daniyatli o‘lkani yaqindan tanishtirish maqsad bo‘lgan.
Mark Riz uning tarjimasini yaqinda Karimov fondi taqdim etgan kitob tarjimasi bilan adashtirmaslikni so‘ragan.
“Mening tarjimam 1926-yildagi jadid tilidan arab yozuvidan kiril yozuviga o‘girilgan asl matndan o‘zim tomonimdan tarjima qilingan. Qodiriy davridagi Markaziy Osiyo, u davrdagi madaniy muhitni tushuntirib berish uchun tarjimaga 500 ga yaqin izohlar qo‘shganman. O‘zbek tilshunoslari va adiblar uni ko‘rib chiqib, tahrirlashgan. Ma’lumot uchun, ushbu asar tarjimasi uchun yolg‘iz o‘zim barcha xarajatlarni ko‘targanman va hozirgacha jiddiy mablag‘ sarflaganman” – deydi Mark Riz.Mark Riz kitobning yakuniy tahriri, dizayni va nashri uchun yetarli mablag‘i yo‘qligini, shu kitobni nashr qilishga hissa qo‘shishini so‘rab, murojaat qilgan.
“Turli kasb egalari, amerikaliklar, o‘zbekistonliklar, birgalikda ushbu buyuk asar tarjimasiga egalik qilsak. Har bir sog‘lom ziyoli jamoa o‘z kechinmalarini adabiy shaklda ifoda etadi. Men sizni Abdulla Qodiriyning “O‘tkan kunlar” asari orqali o‘z madaniyat va qadriyatlaringizni bo‘lishish maqsadida, Amerikada turli kasblarda halol topgan pulingiz bilan ushbu loyihani qo‘llab-quvvatlashga chorlayman. Bu esa boshlagan ezgu ishimizga so‘zsiz baraka olib keladi. Kitob 2019-yil aprel oyida Abdulla Qodiriyning tug‘ilgan kuniga bag‘ishlab chop etiladi” – deydi Mark Riz.