O‘zMU topilgan xazinaning deyarli barchasi universitet muzeyining xodimlari tomonidan so‘nggi 2—3 yillar davomida yig‘ilganini ma’lum qildi. Bu haqda O‘zMU matbuot xizmati xabar berdi.
Universitet xazina haqidagi xabarlarda keltirilgan 5 ta rasmdagi kitoblar va osori-atiqalar universitetda yo‘qligi, ular internetdagi resurslardan olingani hamda maqola muallifi tomonidan ma’lumotning jozibadorligini oshirish uchun fotokollaj uchun foydalanilganini ma’lum qildi.
Bundan tashqari, Toshkent shahrida topilgan deb e’lon qilingan osori-atiqalar, noyob san’at asarlari va qimmatli buyumlar bo‘yicha arxeologik izlanishlar O‘zMU olimlari tomonidan olib borilmagan.
“Ushbu ashyolarda universitetga tegishliligini tasdiqlovchi muhrlar mavjud (Turkestanskiy Narodniy Universitet va SAGU muhrlari) va hozirda ular universitetda saqlanmoqda”, – deyiladi O‘zMU xabarida.
Shuningdek, universitet 8 kilogramm oltin topilganini ham rad etib, bu haqda O‘zMUda rasmiy ma’lumot yo‘qligini bildirgan.
Bir necha kun avval, Toshkent markazidagi eski binolarning yerto‘lasida 80 yil avval yo‘qolgan va million AQSh dollaridan ortiq qiymatga ega xazina topilgani haqida xabar tarqaldi. Keyinroq xazina Milliy universitetning yerto‘lasidan chiqqani haqida xabar berilgandi.
Izoh (0)