Shavkat Mirziyoyevning Germaniyaga tashrifi, Jamshid Kenjayev ishi bo‘yicha boshlangan sud, Qashqadaryoda yog‘gan 1 metrlik qor va kunning boshqa muhim xabarlari
21-yanvarning e’tiborga molik xabarlari — “Daryo” dayjestida.
O‘zbekiston Respublikasi Prezidenti Shavkat Mirziyoyev 20-yanvar kuni rasmiy tashrif bilan Germaniya poytaxti Berlin shahriga keldi.
Germaniyada o‘qiyotgan, ilmiy izlanishlar olib borayotgan bir guruh o‘zbekistonlik yoshlar Berlin shahrida Shavkat Mirziyoyevni katta xursandchilik bilan kutib oldi.
Belvyu saroyida Prezident Shavkat Mirziyoyev bilan Prezident Frank-Valter Shtaynmayerning uchrashuvi bo‘lib o‘tdi.
So‘ng Shavkat Mirziyoyev va Germaniya Federal kansleri Angela Merkelning muzokaralari oldidan ommaviy axborot vositalari vakillari uchun brifing o‘tkazildi.
Shundan keyin O‘zbekiston Respublikasi Prezidenti Shavkat Mirziyoyev 21-yanvar kuni Germaniya Federal kansleri Angela Merkel bilan muzokara o‘tkazdi.
***
Toshkentda oradan besh oy o‘tib “Aurum 898” tungi klubida o‘ldirilgan sportchi Jamshid Kenjayev ishi bo‘yicha birinchi sud eshituvi boshlandi.
“Sudlanuvchilar kursisida tungi klubning to‘rt nafar qo‘riqchisi. Zalda esa — Kenjayevning otasi va bevasi”, — deyiladi xabarda.
***
Qashqadaryo viloyatining Surxondaryo bilan chegaradosh Dehqonobod tumanidagi Oybek tog‘i yon-bag‘irlarida yoqqan qor qalinligi salkam bir metrga yetgan.
Mahalliy aholining ta’kidlashicha, bu hudud uchun qalin qor tushishi noodatiy hodisa.
Dehqonobod tumanidagi Do‘konxona va Oqrabot qishloqlarida yoqqan qor manzarasi aks etgan fotolarni nashr e’lon qildi.
***
Toshkentda jinoyat sodir etganligi uchun qidiruvda bo‘lgan bir guruh shaxslar ushlandi. Ular qo‘lga olish chog‘ida faol qarshilik ko‘rsatgan.
Toshkent shahar IBBB xodimlari tezkor-qidiruv tadbirlarini o‘tkazish davomida 26 yashar Vohid Toshmatovning yashash joyi aniqlandi. Bir necha bor sudlangan bu shaxs joriy yil 14-yanvarda Farg‘ona viloyat IIB tomonidan firibgarlik jinoyatini sodir etgani uchun qidiruvga berilgandi
Toshmatovni qo‘lga olish chog‘ida uning kvartirada birga bo‘lgan qarindoshlari IIBB xodimlariga faol qarshilik ko‘rsatdi, ikki nafar xodimga tan jarohati yetkazildi. Yordamga yetib kelgan qo‘shimcha naryad Toshmatov bilan birga jami 10 kishini qo‘lga oldi.
***
Garvard bitiruvchisi Olga Ponkratova Navoiy tog‘-metallurgiya kombinati direktorining o‘rinbosari etib tayinlandi.
U O‘zbekistondagi davlat organlariga xorijiy investorlarni jalb etish bo‘yicha tavsiyalar, Invest in Uzbekistan, volfram klasteri konsepsiyalarini ishlab chiqqan. Loyiha-boshqaruv milliy agentligi uchun davlat tog‘-kon aktivlari auditini o‘tkazgan, ularda soliq islohotlarini o‘tkazish masalalarida ishtirok etgan.
