“Lokomotiv”—“Paxtakor”. Bugun chempion nomi ma’lum bo‘lishi mumkin

26-noyabr, dushanba kuni futbol bo‘yicha O‘zbekiston Pepsi Superligasining 31-turi doirasida so‘nggi bellashuv bo‘lib o‘tadi.

Unda chempionlik uchun kurashayotgan “Lokomotiv” klubi o‘z maydonida “Paxtakor”ni qabul qiladi. O‘yin Toshkent vaqti bilan 18:00 da boshlanadi. Chempionat tugashiga bir tur qolganda (bugungi o‘yindan tashqari) “Paxtakor” “Lokomotiv”dan 6 ochko ortda qolmoqda. Amaliy jihatdan qaralsa, “Lokomotiv” chempionlikka deyarli yaqin kelib qolgan. Xo‘sh, unda qanday holatda “Paxtakor” chempion bo‘lishi mumkin? Reglamentga ko‘ra, birinchi navbatda tomonlarning o‘zaro o‘yiniga e’tibor qaratiladi. Birinchi bosqichda ular o‘zaro ikki marta durang qayd etgan:

29-aprel

“Lokomotiv” — “Paxtakor” 0:0

1-avgust

“Paxtakor” — “Lokomotiv” 1:1

Mana shu holatda ustunlik “Lokomotiv” tomonida, chunki “temiryo‘lchilar” safarda to‘p kiritgan. Agar o‘zaro o‘yinlarda tenglik bo‘lsa, safarda ko‘proq gol urgan jamoaga ustunlik beriladi deb yozib qo‘yilgan.

Biroq Superliga formatiga ko‘ra, mazkur jamoa ikkinchi bosqichda yana ikki marta to‘qnash kelishi kerak (bugungi o‘yin ikkinchisi bo‘ladi).

20-oktabr

“Paxtakor” — “Lokomotiv” 1:3

Mana shu holatda “Paxtakor” o‘zaro o‘yinlardagi ustunlikni o‘z tomoniga og‘dirib olishi uchun bugun 3 ta gol farqi bilan zafar quchsa yetarli. Biroq bu hali chempionlik degani emas. Chunki turnir jadvalida “Loko” 6 ochkoga ilgarilab ketgan. “Paxtakor” so‘nggi turda “Bunyodkor”ni yengishi va “Lokomotiv” Namanganda mag‘lub bo‘lishi ham kerak. Agarda bugun “Paxtakor” 1 ta gol farqi bilan yutsa, kubok shu oqshomdayoq “Lokomotiv”ga topshiriladi. “Paxtakor” 2:0 hisobida zafar quchsa ham yetarli emas. “Paxtakor” 3:1 hisobida ham zafar quchib chempion bo‘la olmaydi. Chunki yuqoridagi ikki o‘zaro durangda baribir “Lokomotiv” safarda ko‘proq gol urgani ko‘rinadi.

“Paxtakor” 4:2, 5:3, 6:4 (shu ketma-ketlikda) hisobida ustun kelsagina, ustunlikni o‘z tomoniga og‘diradi. Chunki endi “sherlar” safarda ko‘proq gol urgan bo‘lib chiqadi.