O‘zbekistonlik jurnalistlar delegatsiyasi Xitoyning Szyansu provinsiyasida bo‘lib, hududiy ommaviy axborot vositalari faoliyati bilan yaqindan tanishdi. Bu haqda delegatsiya tarkibida Xitoyga safar qilgan “Daryo” muxbiri Azizjon Ermatov xabar berdi.
Szyansu – tarkibida 13 shaharni birlashtirgan Xitoyning yirik provinsiyalaridan biri. Provinsiyada 80 milliondan ziyod aholi yashaydi. Provinsiya markazi – Nankin shahri Min sulolasi davrida Xitoy poytaxti bo‘lgan. 2014-yilda ushbu shaharda o‘smirlar o‘rtasida yozgi olimpiada o‘yinlari o‘tkazilgan va shu munosabat bilan kichik olimpiada shaharchasi bunyod etilgan.
Delegatsiya a’zolarini qabul qilgan Szyansu provinsiyasi teleradio korporatsiyasi tarkibida 14 telekanal, 10 radiokanal mavjud. Teleko‘rsatuv va radioeshittirishlarni bir vaqtning o‘zida korporatsiyasi veb-saytida tomosha qilish va tinglash mumkin. O‘zingizga ma’qul kelgan teleko‘rsatuvlar dasturini yuklab olishingiz uchun 2 ta maxsus mobil ilova ham yaratilgan.
“Szyansu teleradio korporatsiyasida 8 ming xodim faoliyat yuritadi. Mutaxassislar tayyorlash va ularning malakasini oshirishga alohida ahamiyat beramiz. Texnik va ijodiy xodimlarimiz AQSh va Buyuk Britaniyaning yetakchi telekompaniyalarida malaka oshirish kurslarida muntazam ishtirok etadi. O‘z navbatida, korporatsiyaning o‘zida ham xorijlik tajribali mutaxassislar bilan treninglar o‘tkazamiz. Bu ishlar uchun har yili 500 million yuan mablag‘ sarflaymiz”, – deydi korporatsiya vitse-prezidenti Szyan Syaopin.
Korporatsiya o‘z kinostudiyasiga hamda to‘rt xil formatdagi kinoteatrlar tarmog‘iga ega. Ayni kunga qadar mazkur kinostudiya tomonidan 400 ga yaqin teleserial va filmlar suratga olingan. Uchrashuv davomida kinostudiya mutasaddilari o‘z film va teleseriallarini o‘zbek tomoshabinlariga ham taqdim etish taklifini bildirishdi.
O‘zbekistonlik jurnalistlar “Sinxua kundaligi” tahririyati va muzeyi faoliyati bilan ham yaqindan tanishishdi. “Sinxua kundaligi” tahririyati tomonidan 14 nomdagi gazeta, 8 nomdagi jurnal chop etiladi. Axborotlar tahririyat tarkibidagi 9 internet sayt, 6 mobil ilova orqali ham tarqatiladi. Tonggi maxsus gazeta 1 million, kechki gazeta esa 3 million nusxada chiqariladi.
“Bu mening o‘zbekistonlik jurnalistlar bilan ilk uchrashuvim. Samarqand, Buxoro kabi tarixiy shaharlaringiz haqida OAV va kitoblardan ko‘p ma’lumot olganman. Aspiranturada ilmiy ish qilgan vaqtimda Abu Ali ibn Sino kitoblarini o‘qiganman. Bugungi uchrashuvdan keyin tez orada O‘zbekistonga borish va sizlar bilan tajriba almashishni maqsad qildim”, – deydi Sinxua axborot agentligi bosh muharriri o‘rinbosari Li Yan.
Uchrashuv davomida Sinxua axborot agentligi xalqaro aloqalar bo‘limi boshlig‘i Shen Chjenjun “Bir makon, bir yo‘l” loyihasi doirasida tajriba va ma’lumot almashish uchun ishlab chiqilgan yangi aksiya taqdimotini o‘tkazdi.
Agentlik bosh muharriri o‘rinbosari Li Yan aksiyaning ramziy belgisini O‘zbekiston Jurnalistlari ijodiy uyushmasi Farg‘ona viloyat bo‘limi raisi Muhammadjon Obidovga topshirdi.
“Xitoy O‘zbekistonning asosiy savdo-iqtisodiy hamkorlaridan biri bo‘lib, ikki mamlakat o‘rtasidagi har tomonlama manfaatli hamkorlik aloqalari rivojlanib bormoqda. Mamlakatlar o‘rtasidagi ikki tomonlama, shuningdek, ShHT, ‘Bir makon – bir yo‘l’ dasturi doirasidagi hamkorlik ko‘lami kengayib, sifat jihatdan yangi bosqichga ko‘tarilmoqda. Bu ikki mamlakat OAV o‘rtasidagi munosabatlarda ham o‘z aksini topmoqda. Tez orada Sinxua axborot agentligi delegatsiyasini O‘zbekistonda qabul qilish va tajriba almashish jarayonini muntazam yo‘lga qo‘yishga tayyormiz”, – deydi O‘zbekiston Jurnalistlari ijodiy uyushmasi Farg‘ona viloyat bo‘limi raisi Muhammadjon Obidov.
Izoh (0)