Joriy yilning 27—30-noyabr kunlari Toshkentda PROlogue xalqaro kinofestivali o‘tkaziladi. Shu munosabat bilan Yoshlar ittifoqida O‘zbekiston Respublikasi Prezidenti maslahatchisining birinchi o‘rinbosari, kinofestival tashkiliy qo‘mitasi raisi Qahramon Quronboyev boshchiligida yig‘ilish bo‘lib o‘tdi. Unda kinofestivalni tashkil etish va yuqori saviyada o‘tkazish masalalari muhokama etildi, deb yozadi O‘zA.
Ilk bor xalqaro maqomda o‘tkazilayotgan mazkur nufuzli tadbir O‘zbekiston yoshlar ittifoqi tomonidan “O‘zbekkino” milliy agentligi, Toshkent shahar hokimligi, Kinematografiyani rivojlantirish markazi, Yosh kinoijodkorlar kengashi, O‘zbekiston milliy kinokomissiyasi va boshqa qator hamkor tashkilotlar bilan birgalikda amalga oshirilmoqda.
“Uzoq yillardan buyon kino sohasida mamlakatimizda bunday nufuzli xalqaro festival o‘tkazilmagan edi, — deydi ‘O‘zbekkino’ milliy agentligi bosh direktori, kinofestival tashkiliy qo‘mitasi raisining o‘rinbosari Furqat Zokirov. — Ilk bor amalga oshirilayotgan mazkur loyihadan juda katta natijalar kutilmoqda. Festivalda ishtirok etish istagini bildirgan mamlakatlar soni 40 dan oshib ketdi. 600 dan ortiq mamlakatdan esa festivalda ishtirok etish uchun filmlar yuborildi. Hozirda mazkur filmlarni saralash ishlari qizg‘in kechmoqda. Kichik bir sirni aytib o‘taman: filmlar orasida tarbiyaviy ahamiyatga ega, shaklan va mazmunan yuksak kinoasarlar ko‘p. Ularni nafaqat festival doirasida, balki, festivaldagi namoyishlardan so‘ng zudlik bilan ketma-ketlikda telekanallarimiz orqali uzatishni rejalashtiryapmiz”.
Shuningdek, yig‘ilishda berilgan topshiriqlarga ko‘ra, Oliy ta’lim muassasalarida ham mazkur tarbiyaviy ahamiyatga ega qisqa metrajli badiiy filmlar namoyishlari o‘tkaziladi. Festival yakunlangach esa, eng sara kinoasarlar ijodkorlari, festival ishtirokchilarining hududlarga safari uyushtiriladi.
Kinofestival jarayonlarini tezkor va xolis yoritib borish maqsadida matbuot markazi tashkil etiladi hamda kinofestival arafasida brifing o‘tkaziladi. Unda mutaxassislarning loyihaga doir ma’lumotlari jonli tarzda uzatiladi.
Izoh (0)